काठमाडौं । पुस महिनाका लागि व्यक्तिगत मुद्दतीतर्फ अधिकांश वाणिज्य बैंकको ब्याजदर स्थिर रहने भएको छ । २० वटा वाणिज्य बैंकहरूले पुस महिनाका लागि सार्वजनिक गरेको ब्याजदरअनुसार ६ वटाले ब्याजदर परिवर्तन गरेका छन् भने बाँकी १४ वटाको भने स्थिर रहेको छ ।
पुस महिनाका लागि कृषि विकास, प्राइम कमर्सियल र एनएमबि बैंकले भने व्यक्तिगततर्फको मुद्दतीमा ब्याजदरमा केही प्रतिशतले वृद्धि गरेका छन् । जसमा प्राइम कमर्सियल बैंकले मंसिर महिनामा व्यक्तिगत मुद्दतीतर्फ रहेको ५.५७ प्रतिशत ब्याजदरलाई वृद्धि गरेर पुस महिनाका लागि ६.२५ प्रतिशत पुर्याएको छ भने एनएमबि बैंकले ५.७५ प्रतिशतबाट ६.६ प्रतिशत पुर्याएको छ ।
कृषि विकास बैंकले पनि मंसिर महिनाको तुलनामा पुसका लागि व्यक्तिगत तर्फको मुद्दतीमा झिनो अंकले ब्याजदर वृद्धि गरेको छ । बैंकले मंसिर महिनामा ५.५३ रहेको ब्याजदरलाई पुस महिनाका लागि ५.५७ प्रतिशत पुर्याएको हो ।
पुस महिनाका लागि तीन वटा बैंकहरूले ब्याजदर घटाएका छन् । जसमा, एनआइसी एशिया बैंकले मंसिर महिनामा कायम रहेको व्यक्तिगत मुद्दतीतर्फको ब्याजदर ६.७९ प्रतिशतबाट घटाएर ६.६ प्रतिशत कायम गरेको छ ।
त्यस्तै, सानिमाले मंसिर महिनामा कायम रहेको ६.१५ प्रतिशत ब्याजदरलाई घटाएर पुसका लागि ६.०५ प्रतिशत कायम गरेको छ भने नेपाल बैंकले पनि मंसिर महिनामा रहेको ५.९५ प्रतिशत ब्याजदरलाई ५.६ प्रतिशतमा कायम गरेको छ ।
पुस महिनामा एभरेष्ट, कुमारी, नेपाल एसबीआई, लक्ष्मी सनराइज, ग्लोबल आइएमई, सिटिजन्स, प्रभु, माछापुच्छ्रे, स्टान्डर्ड चाटर्ड, हिमालयन, एनआइएमबि, सिद्धार्थ, नबिल र राष्ट्रिय वाणिज्य बैंकको ब्याजदर भने मंसिर महिनामा कायम भएकै व्यक्तिगत मुद्दतीतर्फको ब्याजदर लागू हुनेछ ।
