हेटौंडा । राप्रपा नेपालका अध्यक्ष एवम् पूर्व उपप्रधान तथा गृहमन्त्री कमल थापाले देश बचाउन राजा र जनताको साझेदारी आवश्यक रहेको बताएका छन् ।
शुक्रबार हेटौडामा आयोजित अगुवा कार्यकर्ता भेटघाटलाई सम्बोधन गर्दै अध्यक्ष थापाले राष्ट्रिय एकताको विषयमा राजनीतिक दलहरूको एउटै स्वर नहुँदा बाह्य शक्तिहरूले आक्रमण गर्ने गरेको बताए ।
उनले विदेशीहरूको ठुलो चलखेलले देशमा आर्थिक सङ्कट उत्पन्न भएको विषम परिस्थितिमा पनि दलहरू विभाजित भएर एकले अर्कालाई आरोप प्रत्यारोपमा लाग्नु स्वाभाविक नभएको बताए ।
अहिलेको अवस्थामा बिपी कोइरालाको मेलमिलाप नीति जरुरी भयो उनको नीति अवलम्बन गर्न नसक्दा राष्ट्रियता र प्रजातन्त्र खतरामा परेको उनले भने ।
देश बचाउन राजा र जनताको साझेदारी आवश्यक छ उनले भने । प्रजातन्त्र दिवसका अवसरमा राज ज्ञानेन्द्रे दिनुभएको सकारात्मक सन्देशलाई केही नेताहरूले कटाक्ष गरेको भन्दै यो संविधानले बिचार र स्वतन्त्रताको ग्यारेन्टी गरेकोले राजाका बिचारलाई अतिक्रमण गर्न खोज्नु गलत भएको टिप्पणी गरे ।
अहिले हिन्दु राष्ट्र र राजसंस्थाको पक्षमा लाखौँ जनताहरू लागिसकेको भन्दै उनले राजाको मन्तव्य कसैको विरुद्ध नभएको बताए ।
राजालाई दोष देखाएर आफ्ना गल्तीहरू ढाकछोप गर्न खोज्नेहरूलाई अब जनताले नछाड्ने भन्दै उनले लोकतन्त्रको नाममा लुटतन्त्र गर्न कसैलाई छुट नभएको बताए ।
अहिलेको प्रणालीले मुलुकको हित र रक्षा हुन नसक्ने भन्दै थापाले हिन्दु राष्ट्र र संवैधानिक राजसंस्था पुरस्थापना हुने समय आइसकेको दाबी गरे ।
विदेशी शक्तिहरूको प्रभाव देशमा परेकाले आफूहरू विस्थापित हुनुपरेको भन्दै उनले अब राप्रपाको एकता जरुरी भएको बताए ।
‘मलाई अब पद चाहिएको छैन पार्टी एक भएर राष्ट्र केन्द्रित गराउन सके पुग्छ’, उनले भने । आफूले अब निर्वाचनमा समेत भाग नलिने घोषणा गरिसकेको भन्दै उनले पार्टीलाई एक ढिक्का गराएर राष्ट्रवादी,देशभक्त र प्रजातन्त्रवादी शक्तिहरूबिच एकता अहिलेको आवश्यकता रहेको बताए ।
राष्ट्रवादी शक्तिहरू एकजुट बनाउन राष्ट्रिय प्रजातन्त्र पार्टीका अध्यक्ष राजेन्द्र लिङ्देनप्रति लक्षित गर्दै आग्रहसमेत गरे । जे भयो भयो अब हामी झगडा गरेर रिसाएर होइन हामीले सत्ता केन्द्रित नभई राष्ट्र केन्द्रित भएर हामी एक हुनुपर्छ उनले भने ।
चुनाव जित्नु र हार्नु आफ्नो ठाउँमा छ तर मकवानपुरको लागी आफूले धेरै विकासका कामहरू गरेको भन्दै । राजनीतिक यात्रामा भएका उत्तर चढावलाई आफूले सिकाइको रूपमा लिएको बताए ।
सत्ता र सडकमा हिँड्दै गर्दा स्वाभिमानी र निष्ठावन भएर काम गरेको भन्दै उनले साढे चार दशकसम्म आफूले परिकल्पना गरेको विचार र बाटो यथार्थ बन्दै आएको बताए ।
कार्यक्रममा पार्टीका महामन्त्री राजाराम बर्तौलाले राप्रपा नेपाल र नेतृत्वलाई कमजोर बनाउने देशीविदेशी षड्यन्त्र र योजना असफल भएको दाबी गरे । जिल्ला अध्यक्ष गुरुप्रसाद सापकोटा, नेतृ मन डिसि लगायतले कार्यक्रममा बोलेका थिए ।
