पूर्वविशिष्टहरूको सुविधा घटाउने गरी कानून बनाउन लागिपरेका छौँ : प्रवक्ता महत

काठमाडौं । नेपाली कांग्रेसका प्रवक्ता डा. प्रकाशशरण महतले पूर्वविशिष्टहरूको सुविधा कटौती गर्ने गरी कानून निर्माणको प्रक्रिया अघि बढिरहेको बताएका छन्।

आइतबार संसद भवन, बानेश्वरमा सञ्चारकर्मीसँग कुरा गर्दै प्रवक्ता महतले सरकार पूर्वविशिष्ट व्यक्तिहरूका लागि सुविधा थप्ने होइन, घटाउने उद्देश्यले कानून बनाउन लागिपरेको स्पष्ट पारे।

उनले पूर्वविशिष्टहरूलाई आजीवन सुविधा दिने गरी कुनै पनि कानून ल्याउने तयारी नभएको बताउँदै यस विषयमा फैलिएका हल्लामा कुनै सत्यता नरहेको उल्लेख गरे।

प्रवक्ता महतले गणतन्त्र स्थापनापछि राजसंस्थालाई पुनर्स्थापित गर्ने सवाल नै नउठ्ने बताउँदै नेपाली जनताले यस्तो जोखिम लिन नसक्ने धारणा व्यक्त गरे।