काठमाडाैं, ३० भदाै । जेन–जेड आन्दोलनपछि जनजीवन सामान्य अवस्थामा फर्किए पनि नेपाल स्टक एक्सचेन्ज (नेप्से) खोल्ने कि नखुल्ने भन्ने विषयमा अन्यौल कायमै रहेको छ।
गत भदौ २३ र २४ गतेको आन्दोलनका कारण नेप्सेले भदौ २९ देखि असोज २ गतेसम्म बजार बन्द राख्ने निर्णय गरेको थियो। तर अहिले स्थिति सामान्य बन्दै गएको र जनजीवन पनि सुधारिएको देखिएकाले बजार खोल्ने विषयमा लगानीकर्ताहरूमा चासो बढेको छ।
लगानीकर्ताहरूले बजार खोल्ने वा नखोल्ने निर्णय छिट्टै लिनुपर्ने पक्षमा जोड दिएका छन्। नेपाल धितोपत्र बोर्ड (सेबोन) र नेप्सेबीले पनि हाल कारोबार खोल्ने विषयमा छलफल गरिरहेका छन्। सेबोन अध्यक्ष सन्तोष नारायण श्रेष्ठले भने, “प्राविधिक रूपमा कारोबार खोल्न कुनै समस्या छैन, तर बजार खुलाउने निर्णय कस्तो हुने हो भन्ने कुरा हेर्नुपर्छ।”
हिजो भदौ २९ गते पनि बोर्ड र नेप्सेबी बीच छलफल भएको थियो। छलफलमा कारोबार खोल्ने कुनै प्राविधिक समस्या नभएको जनाइएको छ। तर बजार अनुकूल अवस्था कस्तो हुनेछ भनेर हेरेर मात्रै निर्णय लिने जानकारी अध्यक्ष श्रेष्ठले दिए।
श्रेष्ठका अनुसार कारोबार खोल्ने वा नखोल्ने विषय भोलिसम्म निश्चित हुनेछ। “यसअघि असोज २ गतेसम्म कारोबार बन्द हुने निर्णय भएको थियो। अहिले अन्य क्षेत्रहरु पुरानै लयमा फर्किइसकेका छन् र जनजीवन पनि सामान्य हुँदै गएको छ। अब बजार खोल्ने विषयमा भोलिसम्म निर्णय हुनेछ,” उनले बताए।
यसैबीच, लगानीकर्ताहरूको प्रमुख चासो भनेको बजारको भविष्य र स्थायित्वबारे स्पष्टता पाउनु नै रहेको छ।
