‘जेन-जी’ आन्दोलनका शहीदको सम्झनामा बारामा दीप प्रज्वलन

बारा । नेपाली कांग्रेस, बाराले हालै ‘जेन-जी’ आन्दोलनका क्रममा ज्यान गुमाएका शहीदहरूको सम्झनामा दीप प्रज्वलन कार्यक्रमको आयोजना गरेको छ। जिल्लाको सदरमुकाम कलैयास्थित भरत चोकमा आयोजित यस कार्यक्रममा दिवंगत आत्माहरूको चीर शान्तिको कामना गर्दै मौनधारण पनि गरिएको थियो।

नेपाली कांग्रेस बाराका जिल्ला सभापति राजेश राय यादवले यस दुःखद घटनाले समाजमा गहिरो पीडा पुर्‍याएको बताउँदै आन्दोलनका क्रममा ज्यान गुमाउनेहरूप्रति श्रद्धाञ्जली अर्पण गर्नुभयो। उहाँले भविष्यमा यस्ता घटना दोहोरिन नदिन राज्यले जिम्मेवार र संयमित भूमिका निर्वाह गर्नुपर्नेमा जोड दिनुभयो।

सभापति यादवले लोकतन्त्रमा नागरिकको अभिव्यक्ति स्वतन्त्रता र विरोध गर्ने अधिकारको सम्मान हुनुपर्ने कुरामा पनि जोड दिनुभयो। भदौ २३ र २४ गते भएको उक्त आन्दोलनमा कम्तीमा ७३ जनाले ज्यान गुमाएको स्मरण गर्दै उपस्थित सबैले लोकतन्त्र र अभिव्यक्ति स्वतन्त्रताको रक्षाका लागि निरन्तर आवाज उठाइरहने प्रतिबद्धता व्यक्त गरे।

श्रद्धाञ्जली कार्यक्रममा नेपाली कांग्रेसका जिल्लास्तरीय नेता तथा कार्यकर्ताहरूको उल्लेख्य सहभागिता रहेको थियो।