काठमाडौं । लोकप्रिय नेपाली टेलिभिजन सिरियल ‘दियो’ को २५ औं भाग सफलतापूर्वक सम्पन्न भएको अवसरमा काठमाडौंमा एक विशेष कलाकार भेटघाट तथा शुभकामना आदानप्रदान कार्यक्रम आयोजना गरिएको छ। सिरियलले नेपाली समाजमा सकारात्मक सन्देश फैलाएको भन्दै कलाकार तथा निर्माण पक्षले खुसी व्यक्त गरेका छन्।
कार्यक्रममा बोल्दै सिरियलका कलाकारहरूले ‘दियो’ को कथावस्तु निकै सकारात्मक रहेको बताए। उनीहरूले सिरियलमा आफूहरूले सकारात्मक वा नकारात्मक जुनसुकै भूमिका निभाए पनि यसले समाजलाई दिन खोजेको सन्देश सकारात्मक र उपयोगी रहेकोमा जोड दिए।
सिरियलकी निर्माता पद्मा उप्रेतीले ‘दियो’ बनाउनुको मुख्य उद्देश्य समाजमा आफूले देखेका र सुनेका यथार्थ घटनाहरूलाई पर्दामा उतार्नु रहेको बताउनुभयो। उहाँका अनुसार यो सिरियलले एउटी नारीले आफ्नो परिवारका लागि के-कति गर्न सक्छिन् भन्ने सकारात्मक सन्देश प्रवाह गरेको छ।
त्यस्तै, निर्देशक श्रीकृष्ण थापाले ‘दियो’ एक महिलाले लेखेको र समाजको यथार्थपरक कथामा आधारित सिरियल भएकाले यसको निर्देशन गर्न आफूलाई निकै मन लागेको बताउनुभयो। उहाँले यो सिरियल करिब ५० वर्षअगाडिको कथा भएकोले त्यो बेलाको अवस्थालाई दुरुस्तै देखाउनु चुनौती भए पनि आजको पुस्ताले त्यो बेलाको सामाजिक अवस्था बुझ्नका लागि पनि सिरियल हेर्नैपर्नेमा जोड दिनुभयो।
युवा अभियान्ता तथा समाजसेवी पुष्कर राज पाण्डेले ‘दियो’ सिरियलले सबैको घरमा ‘दियो बाल्ने’ काम गरेको र यसको यथार्थ चित्रणका कारण यो एक पारिवारीक सिरियल बनेको बताउनुभयो। उहाँले ‘दियो’ लाखौं भागसम्म सफल होस् भनी शुभकामना व्यक्त गर्नुभयो।
गायक, नायक तथा समाजसेवी सुधीर राज श्रेष्ठले पनि सिरियललाई माया गर्न र हेर्न सबै नेपालीलाई आग्रह गर्नुभयो। कार्यक्रममा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो। कार्यक्रमलाई पत्रकार तथा समाजसेवी सावित्री बस्नेत सबुले सहजीकरण गर्नुभएको थियो।
