काठमाडौं । क्यानेडियन पपस्टार द वीकेन्डले आफ्नो विश्व भ्रमण ‘आफ्टर आवर्स टिल डन’ मार्फत सांगीतिक इतिहासमा नयाँ कीर्तिमान स्थापित गरेका छन् । यो टूरले १ अर्ब अमेरिकी डलरभन्दा धेरै कमाएको छ ।
यो पुरुष एकल कलाकारकोे अहिलेसम्मकै सबैभन्दा ठूलो कमाइ रहेको अमेरिकी सङ्गीत एवम् मनोरञ्जन पत्रिका बिलबोर्ड म्यागजिनले जनाएको छ ।
सन् २०२२ मा सुरु भएको यो विश्व भ्रमण अहिलेसम्म उत्तर अमेरिका, युरोप, बेलायत, ल्याटिन अमेरिका, ब्राजिल, मेक्सिको र अष्ट्रेलियामा सम्पन्न भइसकेको छ । बिलबोर्डका अनुसार सन् २०२६ का लागि घोषणा गरिएका कन्सर्टहरूमा अहिले नै ७५ लाखभन्दा बढी टिकट बिक्री भइसकेका छन् ।
पहिलो चरणदेखि हालसम्मका ५३ कार्यक्रममार्फत टूरको कुल कमाइ १ अर्ब डलरभन्दा बढी पुगेको छ । विशेषगरी २०२५ को उत्तर अमेरिकी टूर अत्यन्त सफल मानिएको छ, जसमा ४० भन्दा धेरै सोल्ड–आउट शो थिए ।
यस अवधिमा वीकेन्डले न्यूयोर्क, डेनभर, सान्टा क्लारा, सियाटल, एडमन्टन, मोन्ट्रियल, ओर्लान्डो, आर्लिंगटन र ह्युस्टनका स्टेडियमहरूमा इतिहासकै सबैभन्दा धेरै कमाउने अश्वेत पुरुष कलाकारका रूपमा नयाँ रेकर्ड बनाए ।
द वीकेन्डको यो ऐतिहासिक टूर सन् २०२६ मा मेक्सिको, ब्राजिल, युरोप र बेलायतमा थप ४० भन्दा बढी नयाँ कार्यक्रमसहित जारी रहनेछ ।
