पर्वत, १ पुष । पर्वत उद्योग वाणिज्य संघको आयोजनामा ८औँ पर्वत महोत्सव–यही पौष ९ गतेदेखी १९ गतेसम्म सञ्चालन हुँदैछ। महोत्सवको तयारी आयोजकले तिव्र पारेको छ । स्थानीय कला, संस्कृति, कृषि, उद्योग, पर्यटन र परिकारको प्रवद्र्धन गर्दै पर्वत जिल्लालाई उत्कृष्ट पर्यटकीय गन्तव्य बनाउने उद्देश्यका साथ आयोजना गरिएको महोत्सवमा विविध सांस्कृतिक कार्यक्रम लोक नाच, संगीत प्रस्तुति, नाटक, भजन, रत्यौली, जातजातीका झाकी प्रस्तुति, लोक दोहोरी गीत प्रतियोगिता र टिकटक÷सोसल मिडिया च्यालेन्ज आयोजित छन्। यसैगरी, औद्योगिक तथा व्यापारिक प्रदर्शनी मार्फत स्थानीय उत्पादन, कृषि प्रविधि, हस्तकलाका वस्तु, लघु घरेलु उत्पादन, पशुजन्य तथा वनजन्य उत्पादन प्रदर्शनी र बिक्री हुनेछ ।
महोत्सवमा गण्डकी प्रदेशस्तरीय औद्योगिक प्रदर्शनी, उत्कृष्ट स्टल पुरस्कार, बाल उद्यान र मनोरञ्जनात्मक कार्यक्रम, पर्वतका प्रसिद्ध पर्यटकीय स्थलहरूको जानकारी, भलिबल प्रतियोगिता, विद्यालय स्तरीय खेलकुद प्रतियोगिता र जानकारी प्रविधि प्रदर्शनी पनि रहनेछ। पर्वत उद्योग वाणिज्य संघका सदस्य, लघु घरेलु तथा महिला उद्यमीका स्टलमा भाडामा छुटको व्यवस्था गरिएको छ ।
पर्वत उद्दोग वाणिज्य संघका अध्यक्ष ठाकुर वि पौडेलले भने, “महोत्सवले केवल सांस्कृतिक मनोरञ्जन मात्र होइन, स्थानीय व्यवसाय, कृषि र पर्यटनको प्रवद्र्धनमा महत्वपूर्ण भूमिका खेल्नेछ । सहभागीले स्थानीय परिकारको स्वाद लिन र उत्पादन प्रदर्शन गर्न सक्नेछन्।” अध्यक्ष पौडेलले महोत्सव लाई सफल बनाउन सवैमा आग्रह समेत गरेका छन् । महोत्सवमार्फत शान्ति र सद्भावको सन्देश प्रवाह गर्दै, पर्वत जिल्लाको सांस्कृतिक धरोहर र आर्थिक पहिचानलाई प्रवद्र्धन गर्ने लक्ष्य राखेको पौडेलले बताए ।
यस्तै महोत्सवका प्रचारप्रसार संयोजक खड्कप्रसाद खनालका अनुसार महोत्सवले पर्यटकलाई आकर्षित गरेर पर्वत जिल्लाको पर्यटन प्रवद्र्धनमा सहयोग पु-याउनेछ । यसबाट स्थानीय व्यवसायी र उद्यमीहरूले आफ्नो उत्पादनलाई व्यापक दर्शकसामु प्रस्तुत गर्ने अवसर पाउने खनालको भनाई छ ।
आर्थिक संयोजक कमल जिसीले महोत्सवले स्थानीय पहिचान र सांस्कृतिक धरोहरको संरक्षण तथा प्रवद्र्धनमा महत्वपूर्ण भूमिका खेल्ने बताएका छन् । महोत्सवले कला, संस्कृति र व्यवसायलाई एउटै प्लेटफर्ममा ल्याउने र स्थानीय उत्पादन, पर्यटन र सांस्कृतिक गतिविधिहरूले पर्यटकहरूलाई आकर्षित गर्ने भन्दै जिल्लाको आर्थिक र सांस्कृतिक पहिचान मजबुत बनाउने जिसीले बताए ।
महोत्सवको मुख्य स्थान कुश्मा नगरपालिका–५, वडागाउ स्थित खेलकुद मैदानमा हुने छ । आयोजले नागरिक, विद्यार्थी, व्यवसायी र पर्यटक सबैलाई महोत्सवमा सक्रिय सहभागी बन्न आह्वान गरेका छन्। महोत्सवमा गण्डकी प्रदेशस्तरीय औद्योगिक प्रदर्शनी,लोक नृत्य, संगीत, नाटक, भजन, रत्यौली र झाकी प्रस्तुति,उत्कृष्ट स्टल पुरस्कार,स्थानीय खानाका परिकार र हस्तकला प्रदर्शनी,बाल उद्यान र मनोरञ्जनात्मक कार्यक्रम,पर्वतका पर्यटकीय स्थलको जानकारी प्रदर्शनी,लघु, घरेलु, कृषि, वन र पशुजन्य उत्पादनको बिक्री र प्रदर्शन, जिल्ला स्तरीय खेलकुद प्रतियोगिता (भलिबल, दौड, छेलो) लगायतका प्रतियोगिताहरु हुनेछन्।
महोत्सवको आयोजकमा नेपाल उद्योग वाणिज्य महासंघ, गण्डकी प्रदेश उद्योग वाणिज्य महासंघ, जिल्ला समन्वय समिति, नेपाल घरेलु तथा साना उद्योग महासंघ पर्वत र नेपाल पर्यटन बोर्ड समेत सहयोगी रहेका छन्।
