राजन थापा
काठमाडौँ । काठमाडौँको बालाजु प्रहरी वृत्तमा प्रहरी, थुनुवा र स्थानीय समुदायको स्वास्थ्य सेवामा पहुँच विस्तार गर्ने उद्देश्यसहित एकदिने नि:शुल्क स्वास्थ्य तथा दन्त शिविर सफलतापूर्वक सम्पन्न भएको छ। नेपालमै पहिलोपटक प्रहरीका लागि लक्षित गर्दै पाँचवटा प्रतिष्ठित स्वास्थ्य संस्था एकै स्थानमा समेटेर सञ्चालन गरिएको यो शिविरले स्थानीय, प्रहरी र थुनुवा समुदायलाई बहुआयामिक स्वास्थ्य सेवा उपलब्ध गराएको छ।
शिविरमा सहभागी प्रमुख स्वास्थ्य संस्था र साझेदारमा ॐ समाज डेण्टल अस्पताल, विनायक अस्पताल तथा प्रसूति गृह प्रा.लि., ग्राण्डी अस्पताल, सुकृ हाउस अफ डायग्नोस्टिक्स एण्ड वेलनेस सेन्टर, र किर्तिपुर आँखा अस्पताल रहेका थिए। शिविरमा ॐ समाज डेण्टल अस्पतालले दन्त र मुख स्वास्थ्यको निगरानी, दाँत सफा गर्ने, सामान्य दन्त उपचार र आवश्यक परामर्श निःशुल्क उपलब्ध गराएको थियो। अस्पताल शाखा प्रमुख सबिना पपन गुरुङको नेतृत्वमा, चिकित्सकहरूले सेवाग्राहीहरूको दन्त समस्याको प्रारम्भिक परीक्षण गरेका थिए। आवश्यक परे, थप उपचारका लागि सेवाग्राहीलाई सम्बन्धित अस्पतालमा रेफर गर्ने व्यवस्था पनि मिलाइएको थियो।
**विनायक अस्पताल तथा प्रसूति गृह प्रा.लि.**ले सामान्य स्वास्थ्य परीक्षण, रक्तचाप, मधुमेह र रक्तचिनी जाँच, औषधि वितरण तथा आवश्यक परामर्श प्रदान गरेका थिए। विशेषगरी थुनुवा/कैदीहरूको स्वास्थ्य जाँच र आवश्यक औषधि उपलब्ध गराएकोमा नेपाल प्रहरीका डिआइजी विश्वराज अधिकारीले धन्यवाद व्यक्त गर्नुभयो। उहाँले प्रहरी, थुनुवा र समुदायका लागि लक्षित यस्ता स्वास्थ्य शिविरहरू अत्यन्तै उपयोगी हुने उल्लेख गर्दै, भविष्यमा पनि यस्ता कार्यक्रम निरन्तर सञ्चालन गर्नुपर्नेमा जोड दिनुभयो।
किर्तिपुर आँखा अस्पतालले आँखा परीक्षण र दृष्टि सुधार सम्बन्धी सुझाव उपलब्ध गराएको थियो। अन्य स्वास्थ्य संस्थाले रक्त परिक्षण, डायग्नोस्टिक परीक्षण र स्वास्थ्य परामर्श सेवा प्रदान गरेका थिए। बालाजु प्रहरी वृत्तका प्रमुख ज्ञान बहादुर बिष्टले प्रहरीको व्यस्त कार्यतालिकाबीच स्वास्थ्य परीक्षणको अवसर उपलब्ध गराउनु सकारात्मक उपलब्धि भएको बताउँदै सहभागी सबै स्वास्थ्य संस्था, चिकित्सक र सहयोगीप्रति धन्यवाद व्यक्त गर्नुभयो। उहाँले प्रहरी स्वस्थ भए मात्र नागरिकलाई प्रभावकारी सेवा दिन सकिने उल्लेख गर्नुभयो।
उक्त अवसरमा **भदौ २४ र २५ गतेको ‘जेन्जी आन्दोलन’**का क्रममा क्षतिग्रस्त भएको बालाजु प्रहरी वृत्तको भवन पुनर्निर्माण कार्य सम्पन्न भई हाल नियमित सेवा सञ्चालनमा रहेको जानकारी पनि दिइएको थियो। शिविरमा रोल्पाली चेली फाउण्डेसनको सक्रिय सहभागिता रहेको थियो। फाउण्डेसनले शिविर सञ्चालनमा आवश्यक सहकार्य गर्दै कार्यक्रमलाई सफल बनाउन महत्वपूर्ण योगदान पुर्याएको आयोजकले जनाएका छन्।
साथै, प्रसिद्ध तान्त्रिक मोहनी गुरु विनोद कार्कीले शिविर सञ्चालनका लागि आवश्यक खानेपानीको व्यवस्था गरी सहयोग गर्नुभएको थियो। उहाँले यस्तो सामाजिक तथा स्वास्थ्य सेवामूलक कार्यक्रममा अबदेखि सधैं सहभागी हुने प्रतिबद्धता व्यक्त गर्नुभएको थियो।
शिविर सञ्चालनमा प्राविधिक/व्यवस्थापन टोलीको महत्वपूर्ण भूमिका रहेको थियो। टोलीमा स्वयंसेवक समन्वयकहरू, फिल्ड असिस्टेन्ट, डेटा व्यवस्थापक, र सुविधा प्रबन्धक समावेश थिए, जसले सम्पूर्ण शिविरको व्यवस्थापन, स्वास्थ्य उपकरणको तयारी, र सेवाग्राहीहरूको दर्ता तथा सहजीकरण सुनिश्चित गरेका थिए। सिबिरमा विभिन्न संघ/संस्था प्रतिनिधिहरूको पनि सक्रिय सहभागिता रहेको थियो। तीमध्ये प्रमुख सहभागीहरूमा अभियानता कल्पना चापागाईं, आस्मा राउत, यमकला के.सि., र सञ्जिला सापकोटा वाग्ले रहेका थिए। सहभागी प्रतिनिधिहरूले कार्यक्रमको सफल सञ्चालनमा योगदान पुर्याएका साथै स्वास्थ्य र सामाजिक सेवामा जागरुकता फैलाउन सहयोग गरेका थिए।
शिविरले प्रहरी, थुनुवा र स्थानीय समुदायबीच सहकार्य बढाउन मात्र नभई स्वास्थ्य सचेतना फैलाउने, व्यक्तिगत स्वास्थ्य र स्वच्छताबारे जागरुकता बढाउने काम पनि गरेको छ। सहभागी सेवाग्राहीहरूले घर नजिकै बहुआयामिक स्वास्थ्य सेवा पाउँदा खुशी व्यक्त गर्दै यस्ता कार्यक्रम निरन्तर सञ्चालनको माग गरे।
साथै, लायन्स क्लब अफ काठमाडौंले आफ्नो “उपकार अभियान” पनि अभियानको क्रममा सञ्चालन गरेको छ। क्लबका अध्यक्ष सुशिला थापा, उपाध्यक्ष कृष्ण कुमार श्रेष्ठ, सचिव दिनेश मुस्कान, क्लब निर्देशक भावना राई र सल्लाहकार वसन्त नालामीले अभियानको व्यवस्थापन र सफलतामा सक्रिय भूमिका निर्वाह गरेका थिए। क्लबका सदस्यहरूमा सिमा रोक्का, दिपा रिजाल, हरि ब. बिष्ट, र सुशिला लामीछाने समावेश थिए।
कार्यक्रमका प्रमुख अतिथि डिस्ट्रिक चिफ एडभाइजर कृष्ण प्रसाद शर्माले क्लबको सामाजिक योगदानको प्रशंसा गर्दै स्वास्थ्य, शिक्षा र समाज सेवामा सक्रियताले समुदायमा सकारात्मक प्रभाव पार्ने उल्लेख गर्नुभयो। विशेष अतिथि मिलन कृष्ण रञ्जितकारले अभियानको उद्देश्य र सामाजिक सेवाका महत्वबारे मन्तव्य व्यक्त गर्नुभयो। अन्य अतिथिहरूमा सामाजिक अभियन्ता तथा पत्रकार राजन थापा, यमुना के.सि., भीमा के.सि. बञ्जरा, प्र. नि. भुवन बराम, बिनोद कार्की, र तान्त्रिक मोहिनी गुरुको उपस्थिती रहेको थियो। अतिथिहरूले अभियानको सफल सञ्चालन र समाजमा योगदान पुर्याउन क्लबका पदाधिकारी तथा सदस्यहरूलाई बधाई तथा शुभकामना व्यक्त गरे।
आयोजकहरूले आगामी दिनमा पनि यस्ता बहुआयामिक स्वास्थ्य र सामाजिक सेवा अभियान सञ्चालन गर्दै समुदायस्तरमा स्वास्थ्य सचेतना र सेवा विस्तारलाई निरन्तरता दिने प्रतिबद्धता जनाएका छन्। यस प्रकारको पहलले नेपालमा प्रहरी, थुनुवा, स्वास्थ्य संस्था, सामाजिक संस्था र समुदायबीचको सहकार्य मजबुत बनाउँदै सेवा प्रवाहलाई थप प्रभावकारी बनाउने विश्वास लिइएको छ।
