चेतना महिला विद्यालयको २०औँ वार्षिकोत्सव तथा वनभोज कार्यक्रम भव्यताका साथ सम्पन्न

काठमाडौँ, टोखा । टोखा नगरपालिकास्थित चेतना महिला माध्यमिक विद्यालयको २०औँ वार्षिकोत्सव तथा वनभोज कार्यक्रम बालाजुको २२ धारामा भव्य रूपमा सम्पन्न भएको छ । शिक्षाबाट वञ्चित रहेका महिलाहरूलाई साक्षर बनाउँदै समाजको माथिल्लो तहसम्म पु¥याउन विद्यालयले खेलेको भूमिकाको कार्यक्रमका वक्ताहरूले उच्च प्रशंसा गरेका छन् ।

प्रगति प्रतिवेदन र स्वागत
विद्यालयकी प्रधानाध्यापक शान्ता पण्डितको सभापतित्वमा सम्पन्न उक्त कार्यक्रममा उहाँले विद्यालयको वार्षिक प्रगति प्रतिवेदन प्रस्तुत गर्नुभयो । प्रतिवेदन प्रस्तुत गर्दै पण्डितले विद्यार्थीहरूको उज्ज्वल भविष्यका लागि विद्यालय सदैव प्रतिबद्ध रहेको बताउँदै उपस्थित सबैलाई हार्दिक स्वागत तथा धन्यवाद ज्ञापन गर्नुभयो ।

त्यस्तै, सहायक प्रधानाध्यापक उर्मिला अमात्यले विद्यालयको २० वर्ष लामो सङ्घर्ष र सफलताको संक्षिप्त इतिहास प्रस्तुत गर्नुभयो । उहाँले शून्यबाट सुरु भएको विद्यालयले आज महिला सशक्तीकरणमा पु¥याएको योगदानको स्मरण गर्नुभयो ।

वडा अध्यक्षको प्रतिबद्धताः “विद्यालयको विकासमा सदैव साथ रहनेछ“
कार्यक्रमका प्रमुख अतिथि टोखा नगरपालिका वडा नं. ९ का वडा अध्यक्ष राम भक्त घिमिरेले विद्यालयको प्रगति देखेर आफू निकै प्रभावित भएको बताउनुभयो । उहाँले विद्यालयले सिमित स्रोत र साधनका बाबजुद महिलाहरूलाई शिक्षित बनाउन गरेको मिहिनेतको प्रशंसा गर्दै भन्नुभयो, “वडा कार्यालय र व्यक्तिगत तर्फबाट यो विद्यालयको भौतिक तथा शैक्षिक विकासका लागि म जस्तोसुकै सहयोग गर्न तयार छु । तपाईँहरूको यो साहस र लगावलाई मेरो पूर्ण समर्थन रहनेछ ।“

विज्ञ र सरोकारवालाहरूको धारणा
बाबुराम गौतम (पूर्व शिक्षा शाखा प्रमुख)ः टोखा नगरपालिकाका पूर्व शिक्षा शाखा प्रमुख गौतमले विद्यालयको स्थापना कालदेखिको संघर्षलाई स्मरण गर्दै चेतना महिला विद्यालय टोखाकै एउटा गहना भएको बताउनुभयो । उहाँले यस विद्यालयले महिलाहरूको आत्मविश्वास बढाउन ठूलो काम गरेको उल्लेख गर्नुभयो ।

बृन्दा घटान (वडा सदस्य तथा विद्यालय व्यवस्थापन समिति सदस्य)ः उहाँले विद्यालय व्यवस्थापन समितिको सदस्यको रूपमा विद्यालयका समस्याहरूलाई नजिकबाट बुझेको बताउँदै, महिलाहरूले चुल्होचौकोबाट बाहिर निस्केर शिक्षा लिनु आफैँमा ठूलो क्रान्ति भएको बताउनुभयो ।

श्रीराम पुडासैनी (वरिष्ठ सञ्चारकर्मी)ः पुडासैनीले सञ्चार क्षेत्रबाट विद्यालयको प्रचारप्रसार र उत्थानका लागि सधैँ सकारात्मक भूमिका खेल्ने वचन दिनुभयो ।

गोविन्द भुसाल (राष्ट्रिय अभिभावक सङ्घ)ः केन्द्रिय सदस्य भुसालले अभिभावकहरूको तर्फबाट विद्यालयलाई हुनुपर्ने सहयोग र समन्वयमा कुनै कमी हुन नदिने बताउनुभयो ।

चमेली कँडेल (सामुदायिक प्रहरी टोखा)ः उहाँले शिक्षित महिलाले मात्रै सभ्य समाज निर्माण गर्न सक्ने भन्दै विद्यालयमा अध्ययनरत दिदीबहिनीहरूको सुरक्षा र सचेतनाका लागि सामुदायिक प्रहरी सधैँ तत्पर रहेको बताउनुभयो ।

अनुभव र उपलब्धि
शिक्षकको तर्फबाट मिना लामाले आफ्नो अनुभव सुनाउँदै भन्नुभयो, “मैले विद्यार्थीहरूलाई पढाउने मात्र होइन, उहाँहरूबाट जीवनका धेरै भोगाइ र अनुभवहरू पनि सिक्ने अवसर पाएकी छु ।“ कक्षा ५ मा अध्ययनरत विद्यार्थी निर्मायाले यस उमेरमा पनि पढ्न पाएकोमा खुसी व्यक्त गर्दै विद्यालयप्रति कृतज्ञता प्रकट गर्नुभयो ।

तीन पुस्ताको एउटै पाठशाला
यो विद्यालयको सबैभन्दा रोचक र संवेदनशील पक्ष भनेको यहाँ हजुरआमा, छोरी र नातिनीहरू एउटै कक्षामा बसेर अध्ययन गर्छन् । यस्तो फरक उमेर समूह र मनोविज्ञान भएका विद्यार्थीहरूलाई एउटै ठाउँमा राखेर पढाउनु चुनौतीपूर्ण भए पनि शिक्षकहरूले देखाएको धैर्यता र स्नेह अनुकरणीय रहेको कार्यक्रममा चर्चा गरियो ।

गौरवशाली इतिहास
लाइभ नेपाल नेटवर्कका अध्यक्ष पुष्कर राज पाण्डेले विद्यालयको यात्रा कष्ठपूर्ण रहे तापनि यसले हासिल गरेको उपलब्धि लोभलाग्दो रहेको बताउनुभयो । उहाँले भन्नुभयो, “यही विद्यालयमा पढेका महिलाहरू आज वडा सदस्य, नगरपालिका तथा गाउँपालिकाको उपमेयर जस्ता गरिमामय पदमा पुग्न सफल हुनुभएको छ, यो नै विद्यालयको सबैभन्दा ठूलो सफलता हो ।“

पत्रकार तथा समाजसेवी सावित्री बस्नेत ’सबु’ ले अत्यन्तै रोचक र कुशलतापूर्वक कार्यक्रमको सञ्चालन गर्दै उपस्थित सम्पूर्ण अतिथि र सहभागीहरूलाई धन्यवाद ज्ञापन गर्नुभएको थियो । चिसो मौसमका बाबजुद पनि प्राकृतिक सुन्दरताले भरिएको २२ धारामा आयोजित यो कार्यक्रमले विद्यार्थी र शिक्षकहरूमा नयाँ उत्साह थपेको छ ।