कीर्तिपुर । अन्तर-विद्यालय शैक्षिक सञ्जाल (APEN) कीर्तिपुरको आयोजनामा बालबालिकाको प्रारम्भिक सिकाइ र विकासका मापदण्ड (ELDS) सम्बन्धी १० दिने विशेष तालिम आजबाट सुरु भएको छ। युनिसेफ र सेतो गुराँस राष्ट्रिय बाल विकास सेवाको प्राविधिक सहयोगमा सञ्चालित यो तालिम आगामी माघ ४ गतेसम्म चल्नेछ।
तालिमको पहिलो दिन बालबालिकाको प्रारम्भिक सिकाइका मापदण्ड, यसको महत्त्व र व्यवहारिक प्रयोगका विषयमा घनीभूत छलफल गरिएको थियो। विशेषगरी ४ देखि ५ वर्ष उमेर समूहका बालबालिकाको शिक्षण अभ्यासलाई कसरी सुदृढ बनाउने र सिकाइको गुणस्तर कसरी बढाउने भन्नेमा तालिम केन्द्रित रहेको छ।
कार्यक्रममा कीर्तिपुरका १४ वटा विद्यालयबाट २३ जना शिक्षकहरूको सक्रिय सहभागिता रहेको छ। सहभागीहरूको उत्साहजनक उपस्थितिले पहिलो दिनको सत्र निकै प्रभावकारी बनेको आयोजकले जनाएको छ। बालबालिकाको चौतर्फी विकासका लागि तय गरिएका मापदण्डहरूलाई कक्षाकोठासम्म पुर्याउन यो तालिमले महत्त्वपूर्ण भूमिका खेल्ने अपेक्षा गरिएको छ।
