काठमाडौं । ॐ समाज डेण्टल अस्पतालको लोकप्रिय सामाजिक अभियान ‘सडकदेखि सदनसम्म’ अन्तर्गत काठमाडौंको माछापोखरीमा निःशुल्क स्वास्थ्य शिविर भव्य रूपमा सम्पन्न भएको छ। जनस्वास्थ्यलाई नागरिकको घरदैलोसम्म पुर्याउने उद्देश्यले आयोजित उक्त शिविरमा सयौँ सर्वसाधारणले प्रत्यक्ष दन्त तथा अन्य स्वास्थ्य सेवा प्राप्त गरेका छन्।
स्वस्थ्य समाज निर्माणको संकल्प शिविरका मुख्य अभियन्ता एवं ॐ समाज डेण्टल अस्पतालका सञ्चालक डा. सुवास घिमिरेले “उपचारभन्दा रोकथाम महत्वपूर्ण” भएकोमा जोड दिनुभयो। कार्यक्रमलाई सम्बोधन गर्दै डा. घिमिरेले भन्नुभयो, “हाम्रो लक्ष्य कोही पनि अस्पताल धाउन नपरोस् भन्ने हो। स्वास्थ्य नै सबैभन्दा ठूलो धन भएकाले समुदायस्तरमै सचेतना फैलाउन हामी सडकदेखि सदनसम्म पुगिरहेका छौँ।”
युवा अभियन्ता र सामाजिक सहकार्य शिविरलाई सफल पार्न युवा अभियन्ता तथा सामाजिक व्यक्तित्व राजन थापाले व्यवस्थापन र समन्वयमा सक्रिय भूमिका निर्वाह गर्नुभएको थियो। थापाले स्वास्थ्य सेवालाई अस्पतालको चार पर्खालभित्र मात्र सीमित नराखी समुदायसम्म पुर्याउनु आजको आवश्यकता रहेको बताउनुभयो।
त्यस्तै, कार्यक्रममा रोल्पाली चेली फाउण्डेसनकी अध्यक्ष यमकला (यमुना) के.सी. को विशेष उपस्थिति रहेको थियो। उहाँले स्वास्थ्य सेवामा पहुँच नभएका वर्गका लागि यस्ता शिविर वरदान सावित हुने उल्लेख गर्नुभयो।
निर्वाचनको घोषणा र सामाजिक प्रतिबद्धता सोही अवसरमा अध्यक्ष यमकला के.सी.ले आगामी फागुन २१ गते हुने प्रतिनिधिसभा सदस्य निर्वाचनमा सुनसरी निर्वाचन क्षेत्र नं. ४ बाट स्वतन्त्र उम्मेदवारी दिने घोषणा समेत गर्नुभयो। उहाँले आफ्नो सामाजिक सेवाको यात्रालाई अब राजनीतिक माध्यमबाट अझ सशक्त बनाउने प्रतिबद्धता व्यक्त गर्दै सबैको साथ र सहयोगको अपेक्षा गर्नुभयो।
विविध गतिविधि बिहान ७ बजेदेखि दिउँसो १२ बजेसम्म चलेको उक्त शिविरमा कलाकार, पत्रकार, चिकित्सक तथा विभिन्न क्षेत्रका प्रतिष्ठित व्यक्तित्वहरूलाई उनीहरूको योगदानको कदर गर्दै सम्मान समेत गरिएको थियो।
स्थानीय बासिन्दाहरूले घरदैलोमै गुणस्तरीय दन्त सेवा पाएकोमा खुसी व्यक्त गर्दै डा. सुवास घिमिरे र आयोजक टोलीलाई धन्यवाद ज्ञापन गरेका छन्। ॐ समाज डेण्टल अस्पतालले विगत लामो समयदेखि यस्ता सामाजिक उत्तरदायित्वका कार्यहरूलाई निरन्तरता दिँदै आएको छ।
