काठमाडौं । डायमण्ड आर्ट एण्ड कल्चर नेपालद्वारा आयोजित “डायमण्ड चलचित्र रत्न सम्मान तथा अवार्ड–२०८२” कार्यक्रम २०८२ साल माघ २५ गते चाबहिलस्थित चलचित्र विकास बोर्डको सभाहलमा भव्य रूपमा सम्पन्न भएको छ। नेपाली कला, संस्कृति तथा चलचित्र क्षेत्रको संरक्षण, प्रवर्द्धन तथा योगदानको कदर गर्ने उद्देश्यले आयोजना गरिएको उक्त कार्यक्रममा विभिन्न विधामा उल्लेखनीय योगदान पुर्याएका कलाकार, सर्जक तथा चलचित्रकर्मीहरूलाई सम्मान तथा अवार्ड प्रदान गरिएको थियो।
कार्यक्रमका अध्यक्ष तथा डायमण्ड आर्ट एण्ड कल्चर नेपालका अध्यक्ष दिनेश पाख्रिनले कार्यक्रमको औचित्यमाथि प्रकाश पार्दै नेपाली कला, संस्कृति र चलचित्र क्षेत्रको उत्थान तथा सम्मानका लागि यस्ता कार्यक्रम अत्यन्त आवश्यक रहेको बताउनुभयो। कलाकारहरूको योगदानलाई संस्थागत रूपमा कदर गर्नु नै कार्यक्रमको मुख्य उद्देश्य रहेको उहाँले उल्लेख गर्नुभयो। संस्थाका महासचिव कृष्णराज तिमल्सिनाले स्वागत मन्तव्य व्यक्त गर्दै प्रमुख अतिथि, विशिष्ट अतिथि तथा उपस्थित सम्पूर्ण महानुभावहरूप्रति आभार व्यक्त गर्नुभयो।
उहाँले आगामी दिनहरूमा पनि यस्ता सम्मान तथा अवार्ड कार्यक्रमलाई निरन्तरता दिने प्रतिबद्धता व्यक्त गर्नुभयो। कार्यक्रमका प्रमुख अतिथि राष्ट्र, राष्ट्रियता, धर्म, संस्कृति तथा नागरिक बचाउ महाअभियानका संयोजक दुर्गा प्रसाईंज्यू रहनुभएको थियो। कार्यक्रममा विभिन्न क्षेत्रका विशिष्ट व्यक्तित्व, कलाकार, समाजसेवी, बुद्धिजीवी तथा सञ्चारकर्मीहरूको उल्लेखनीय उपस्थिति रहेको थियो। कार्यक्रमको सञ्चालन कलाकार गोपाल ढकाल ‘छन्दे’ले गर्नुभएको थियो। कार्यक्रम सफलतापूर्वक सम्पन्न गर्न सहयोग पुर्याउने सम्पूर्ण अतिथि, सहभागी तथा सहयोगीहरूप्रति आयोजक संस्थाले धन्यवाद व्यक्त गरेको छ।
