२०८२ मा मुद्दती निक्षेपतर्फ ३४ प्रतिशतसम्मले घट्यो ब्याजदर, कुन बैंकको कति घट्यो ?

काठमाडौं– २०८२ सालमा बैंकिङ क्षेत्रको निक्षेपमा निक्षेपकर्ताले पाउने ब्याजमा ठूलो गिरावट आयो । वाणिज्य बैंकहरूले व्यक्तिगत र संस्थागत मुद्दती निक्षेपवापत निक्षेपकर्तालाई प्रदान गर्ने ब्याजमा गएको वर्ष २४ प्रतिशत बढीले कटौती भएको देखिएको हो ।

२०८२ सालको बैशाखमा वाणिज्य बैंकहरूको व्यक्तिगत मुद्दतीतर्फको औसत ब्याजदर ५.९८ प्रतिशत रहेकोमा चैत महिनासम्म आउँदा सो ब्याजदरमा गिरावट आएर ४.४९ प्रतिशतमा झर्यो । जुन औसतमा १ दशमलब ४९ अंक र २४ दशमलब ९ अंकको गिरावट हो ।

त्यस्तै, वाणिज्य बैंकहरूको गत बैशाखमा संस्थागत मुद्दतीतर्फको औसत ब्याजदर ४.४१ प्रतिशत रहेकोमा चैत महिनासम्म आउँदा सो ब्याजदर ३.२९ प्रतिशतमा झर्यो । जुन औसतमा १ दशमलब १२ अंक र ३४.०४ प्रतिशतको गिरावट हो ।

सञ्चालनमा रहेका वाणिज्य बैंकमध्ये अघिल्लो बैशाखमा एनएमबि र एनआईसी एसिया बैंकले व्यक्तिगत मुद्दतीतर्फ सबैभन्दा धेरै अर्थात् ६ दशमलब ६ प्रतिशत ब्याजदर प्रदान गरेका थिए । चैत महिनासम्म आइपुग्दा ती दुवै बैंकको व्यक्तिगत मुद्दतीतर्फको ब्याजदर ५ प्रतिशतमा झरेको छ ।

त्यस्तै, गत बैशाखमा हिमालयन, नेपाल एसबिआई र नेपाल बैंकले व्यक्तिगत मुद्दतीतर्फ सबैभन्दा थोरै ५ दशमलब ५ प्रतिशत ब्याजदर कायम गरेका थिए । चैतसम्म आइपुग्दा ती बैंकको ब्याजदर क्रमशः ५, ४ दशमलब २५ र ४ दशमलब ५ प्रतिशत ब्याजदर कायम भएको छ ।

संस्थागत मुद्दतीतर्फ गत बैशाखमा सबैभन्दा धेरै अर्थात् ५ दशमलब ६ प्रतिशत ब्याजदर कायम गरेका एनएमबि र एनआईसी एसियाले चैत महिनासम्म आउँदा सो ब्याजदरमा कटौती गरेर ४ प्रतिशत कायम गरेका छन् ।

साथै, संस्थागत मुद्दती निक्षेपतर्फको ब्याजदरमा गत बैशाखमा सबैभन्दा थोरै अर्थात् ३ दशमलब २५ प्रतिशत ब्याजदर कायम गरेका नेपाल बैंक र स्ट्यान्डर्ड चार्टर्ड बैंकले चैतसम्म आउँदा ब्याजदरमा कटौती गरेर क्रमशः ३ र २ दशमलब ७५ प्रतिशत कायम गरेका छन् ।