चितवन । जिल्लामा रगतको माग बर्सेनि बढ्दै गए पनि रक्तदाताको सङ्ख्या भने घट्न थालेको छ । उपचारका लागि देशभरबाट बिरामी आउने चितवनमा रगतको माग र आपूर्तिबीच सन्तुलन मिलाउन चुनौतीपूर्ण बन्दै गएको छ ।
नेपाल रेडक्रस सोसाइटी प्रादेशिक रक्तसञ्चार केन्द्र भरतपुरका अनुसार जिल्लामा दैनिक १५० युनिटसम्म रगतको माग हुने गरेको छ । तर, सङ्कलनको अवस्था भने निराशाजनक छ । चालु आर्थिक वर्षको फागुनसम्ममा १६९ स्थानमा आयोजित रक्तदान कार्यक्रमबाट ११ हजार ५३२ युनिट र केन्द्रमा सिधै आएका दाताबाट ३ हजार १८१ युनिट मात्र रगत सङ्कलन भएको छ ।
तथ्याङ्क अनुसार केन्द्रमा आएर रक्तदान गर्नेहरूको सङ्ख्या क्रमिक रूपमा घट्दो छ । आव २०८०/८१ मा केन्द्रमा ६ हजार ९२० युनिट रगत सङ्कलन भएकोमा गत आव २०८१/८२ मा त्यो सङ्ख्या घटेर ४ हजार ६४० मा खुम्चिएको थियो ।
केन्द्रका प्रमुख रमेशकान्त पौडेलका अनुसार युवा जनशक्ति वैदेशिक रोजगारीमा जानु र उमेर बढ्दै गएका दातामा उच्च रक्तचाप तथा मधुमेहजस्ता समस्या देखिनुले दाताको सङ्ख्या घटेको हो । “दाता घट्ने र माग बढ्ने हुँदा सन्तुलन मिलाउन कठिन भएको छ,” उनले भने, “माग धान्न छिमेकी जिल्लाहरूबाट समेत रगत ल्याउने गरिएको छ ।”
नेपाल रेडक्रस सोसाइटी चितवनका सभापति हरि पौडेलले १४ भन्दा बढी जिल्लाबाट रगत ल्याउँदा समेत अपुग हुने गरेको बताए । यहाँ रहेका बीपी कोइराला मेमोरियल क्यान्सर अस्पताल, दुई मेडिकल कलेज, भरतपुर अस्पताल र अन्य निजी अस्पतालका कारण काठमाडौँपछि सबैभन्दा बढी रगतको माग चितवनमै हुने गर्दछ ।
ब्लड डोनर्स सोसाइटी नेपालका अध्यक्ष अर्जुन अधिकारीले रेडक्रसले व्यवस्थापकीय सुधार र सङ्घसंस्थासँग समन्वय बढाए सङ्कलन वृद्धि हुने सुझाव दिएका छन् । यस्तै, भरतपुर अस्पताल विकास समितिका पूर्वअध्यक्ष डा. भोजराज अधिकारीले नयाँ रक्तदातालाई आकर्षित गर्न विद्यालय र क्याम्पसका पाठ्यक्रममा रक्तदानको महत्त्व समेट्नुपर्ने र राज्यका तर्फबाट सहुलियत दिनुपर्ने बताए ।
अहिले क्यान्सरका बिरामी र दुर्घटनाका घाइतेहरूको चापका कारण चितवनमा रगतको माग र आपूर्तिको खाडल गहिरिँदै गएको छ ।—–_____
