पद्मोदय माविमा वातावरण सम्बन्धी अभिमुखीकरण सम्पन्न: ‘हरित क्लब’ गठन र कानुनी साक्षरतामा जोड

सावित्री बस्नेत (सबु)

काठमाडौँ । काठमाडौँ महानगरपालिका वडा नं. २८ लाई “हरित र स्वच्छ वडा” बनाउने महाअभियान अन्तर्गत दोस्रो चरणको दुई दिने “वातावरण सम्बन्धी अभिमुखीकरण तथा सचेतना तालिम” पद्मोदय माध्यमिक विद्यालयमा उत्साहजनक रूपमा सम्पन्न भएको छ। लाइफ नेपाल नेटवर्क प्रा. लि. को आयोजना र काठमाडौँ महानगरपालिका वडा २८ कार्यालयको सहयोगमा सञ्चालित यस कार्यक्रमले विद्यार्थीहरूमा वातावरणीय चेतना र कानुनी साक्षरता अभिवृद्धि गर्ने उद्देश्य राखेको छ।

कार्यक्रममा सोही विद्यालयकी प्रधानाध्यापक (प्र.अ.) डा. शर्मिला पोखरेल प्रमुख अतिथिका रूपमा रहनुभएको थियो। मन्तव्यका क्रममा प्र.अ. पोखरेलले भन्नुभयो, “किताबी ज्ञानसँगै विद्यार्थीहरूलाई वातावरण र प्रकृतिको रक्षा गर्न सिकाउनु नै वास्तविक शिक्षा हो। यस तालिमले हाम्रा विद्यार्थीहरूलाई विद्यालय र समाजको ‘वातावरण दूत’ बन्न उत्प्रेरित गरेको छ।”

कार्यक्रमका विशिष्ट अतिथि, समाज सेवी तथा राष्ट्रिय अभिभावक संघका केन्द्रीय सदस्य गोविन्द प्रसाद भुसालले विद्यार्थीहरूको ऊर्जालाई वातावरण संरक्षणको क्षेत्रमा सही सदुपयोग गर्नुपर्ने धारणा राख्नुभयो। यस्तै, अतिथि तथा प्रशिक्षकका रूपमा उपस्थित अधिवक्ताद्वय साधना बस्नेत र जितेन्द्र पाण्डेले नेपालको संविधान र कानुनमा भएका वातावरणीय हक, प्रदूषण गर्नेलाई हुने सजाय र विद्यार्थीहरूले खेल्न सक्ने कानुनी भूमिकाबारे विशेष प्रकाश पार्नुभएको थियो।

आकर्षक कक्षा र हरित क्लब गठन

तालिमका मुख्य प्रशिक्षक रमेश न्यौपानेले विद्यार्थीहरूलाई ऊर्जा र जल संरक्षणका उपायहरू सिकाउँदै कक्षालाई अत्यन्तै रोचक र आकर्षक बनाउनुभएको थियो। उहाँले बीच–बीचमा वातावरण सम्बन्धी बौद्धिक प्रश्नहरू सोध्ने र चेतनामूलक खेल खेलाएर विद्यार्थीहरूलाई अन्तर्क्रियात्मक ढंगले सिकाउनुभएको थियो। सोही अवसरमा विद्यालयमा वातावरण संरक्षणका गतिविधिहरू निरन्तर सञ्चालन गर्न विद्यार्थीहरूकै नेतृत्वमा ‘हरित क्लब’ (Green Club) समेत गठन गरियो।

समापन र र्‍याली

तालिमको समापन सत्रपछि विद्यार्थीहरूले हात–हातमा प्लेकार्ड बोकेर विद्यालयको मैदान र वरपर सचेतना र्‍याली निकालेका थिए। र्‍यालीमा विद्यार्थीहरूले “पानीको मुहान संरक्षण गरौँ, भविष्य सुरक्षित गरौँ!”, “ऊर्जा बचत, आजको बचत!”, “वातावरण स्वच्छ राखौँ, रोगमुक्त बाँचौँ!” भन्दै नारा लगाएका थिए।

शिक्षक, शिक्षिका, पत्रकार र विद्यार्थीहरूको उल्लेखनीय सहभागिता रहेको उक्त कार्यक्रमको सञ्चालन पत्रकार सावित्री साबु बस्नेतले गर्नुभएको थियो। कार्यक्रमको सभापतित्व ग्रहण गर्नुभएका लाइफ नेपाल नेटवर्क प्रा. लि. का अध्यक्ष पुष्कर राज पाण्डेले दुवै विद्यालयमा सञ्चालित तालिम पूर्ण रूपमा सफल भएको र यसले महानगरको वातावरणीय सुधारमा कोशेढुङ्गाको काम गर्ने निष्कर्षसहित वडा कार्यालय र विद्यालय परिवारप्रति आभार व्यक्त गर्नुभयो। आगामी दिनमा पनि यस्तै सहयोग र साथको अपेक्षा सहित महानगरभरिका सामुदायिक विद्यालयमा यस्तो किसिमको तालिम पुर्‍याउने संस्थाको लक्ष्य रहेको जानकारी गराउनुभयो।