धादिङ । नीलकण्ठ नगरपालिका वडा नं. ८ मा कृषकको उत्पादनलाई सहज रूपमा बजारसम्म पुर्याउने उद्देश्यले कृषि एम्बुलेन्स सेवा सञ्चालनमा ल्याइएको छ । वडा अध्यक्ष प्रकाश कुमार श्रेष्ठसहितको टिमको पहलमा सुरु गरिएको यस सेवाले कृषकको ढुवानी समस्या समाधान गर्दै स्थानीय कृषि अर्थतन्त्रलाई सुदृढ बनाउने अपेक्षा गरिएको छ ।
आँकुरा कृषि तथा पशुपन्छी सहकारी संस्था लिमिटेडमार्फत एक गाडी र एक स्कुटर खरिद गरी कृषि तथा पशुजन्य उपजको संकलन, ढुवानी तथा बिक्री–वितरणलाई व्यवस्थित गरिएको हो । हेफर नेपाल र एक्सन नेपालको सहयोग तथा सहकारीका शेयर सदस्यहरूको योगदानमा सेवा सञ्चालनमा आएको हो ।
वडाअध्यक्ष श्रेष्ठले कृषि एम्बुलेन्स सेवाले कृषकको उत्पादनलाई बजारसम्म छिटो, सुरक्षित र उचित मूल्यमा पुर्याउन महत्वपूर्ण भूमिका खेल्ने बताउनुभयो । उहाँले उत्पादन मात्र होइन, ग्रामीण सडक सुधार र यातायात पहुँच विस्तारसँगै कृषकको जीवनस्तर उकास्न दीर्घकालीन योजना अघि बढाइने उल्लेख गर्नुभयो ।
उहाँका अनुसार उत्पादन केन्द्रदेखि बजारसम्मको सहज पहुँच सुनिश्चित गर्न सडक पूर्वाधार र कृषि ढुवानी सेवा एकअर्कासँग जोडिएर अघि बढ्दा वडा नं. ८ लाई कृषि आत्मनिर्भरतातर्फ लैजान सकिनेछ । स्थानीय तह, सहकारी र कृषकबीचको सहकार्यले उत्पादन, ढुवानी र बजार व्यवस्थापनलाई अझ प्रभावकारी बनाउँदै वडा नं. ८ लाई कृषि विकासको नमुना क्षेत्रका रूपमा स्थापित गर्ने विश्वास लिइएको छ ।
