काठमाडौं । मोटोरोला एज ७० फ्युजन नेपाली बजारमा सार्वजनिक भएको छ । मोटोरोला र चौधरी ग्रुपको सहकार्यमा ललितपुरस्थित लबिम मलको क्यूएफएक्स सिनेमामा विशेष कार्यक्रम आयोजना गर्दै नयाँ स्मार्टफोन सार्वजनिक गरिएको हो ।
स्मार्टफोनको सार्वजनिक मोटोरोला नेपालका कन्ट्री हेड हरि ओम मिश्र र चौधरी ग्रुपका भाइस प्रेसिडेन्ट एस.सी. साबुले गरेका थिए । कार्यक्रममा नेपाली चलचित्र मास्टर्नीका कलाकार तथा निर्माण टिमको समेत उपस्थिति रहेको थियो । उक्त कार्यक्रममा अभिनेत्री प्रियंका कार्की पनि सहभागी थिइन् ।
मोटोरोला र चौधरी ग्रुपले चलचित्र मास्टर्नीसँग सहकार्य गर्दै स्मार्टफोन सार्वजनिक गर्नुका साथै चलचित्रको विशेष प्रदर्शनसमेत आयोजना गरेका थिए । प्रविधि र मनोरञ्जनलाई एउटै कार्यक्रममा जोड्ने उद्देश्यले कार्यक्रम आयोजना गरिएको कम्पनीले जनाएको छ ।
कार्यक्रममा देशभरका डिलर, रिटेलर, इन्फ्लुएन्सर तथा विभिन्न क्षेत्रका अतिथिहरूको सहभागिता रहेको थियो ।
मोटोरोला एज ७० फ्युजनमा ५० मेगापिक्सेलको सोनी एलवाईटी ७१० मुख्य क्यामेरा, मोटो एआई, ७ हजार एमएएच ब्याट्री र ६८ वाट टर्बोपावर चार्जिङ सुविधा रहेको छ । फोनमा १४४ हर्ज रिफ्रेस रेटसहितको १.५के क्वाड–कर्भ्ड डिस्प्ले र ५ हजार २०० निट्ससम्मको ब्राइटनेस उपलब्ध छ । प्रिमियम फेब्रिक फिनिस तथा प्यान्टोनद्वारा छनोट गरिएका रङमा फोन उपलब्ध हुने कम्पनीले जनाएको छ ।
यो स्मार्टफोन २९ अगस्ट २०२६ देखि नेपालभर उपलब्ध हुनेछ । यसको सुरुआती मूल्य ६९ हजार ९९९ रुपैयाँ तोकिएको छ ।
