गैरआवासीय नेपाली संघ (एनआरएनए)ले रसुवाको भोटेकोसी नदीमा आएको बाढीबाट प्रभावित नागरिकको उद्धार, राहत र स्वास्थ्य उपचारका लागि तत्काल ५ करोड रुपैयाँ सहयोग गर्ने भएको छ।
बुधबार आकस्मिक बसेको एनआरएनएको भर्चुअल बैठकले राहत सामग्री, स्वास्थ्य सेवा र पुनःस्थापनाका लागि सहयोग गर्ने निर्णय गरेको हो। त्यसका लागि एनआरएनए अध्यक्ष डा. हेमराज शर्माको संयोजकत्वमा रसुवा बाढी प्रभावितको लागि राहत तथा उद्धार मूल समिति गठन गरिएको छ।
बाढी प्रभावित क्षेत्रमा स्वास्थ्य सेवा पुर्याउन एनआरएनएका संस्थापक अध्यक्ष डा. उपेन्द्र महतोको सहयोगमा चिकित्सकको विशेष टोली परिचालन गरिने भएको छ। टोलीले स्वास्थ्य परीक्षण, प्राथमिक उपचार र औषधि वितरण गर्नेछ।
राहत अभियानका लागि कोषाध्यक्ष कृष्ण तिमल्सिनाको संयोजकत्वमा आर्थिक संकलन समिति गठन गरिएको छ।
त्यसैगरी, उपाध्यक्ष मनोज गोर्खालीको संयोजकत्वमा स्वयंसेवक परिचालन समिति, महासचिव डा. चिरञ्जीवी खड्काको संयोजकत्वमा एनसीसी परिचालन र नेपाल सरकारसँग समन्वयका लागि प्रमुख कार्यकारी राजेन्द्रकुमार राउतलाई तोकिएको छ।
बैठकमा एनआरएनए यूके, क्यानडा, नेदरल्यान्ड, स्वीजरल्यान्ड, अस्ट्रेलिया, जापान, सिसेल, साउदी अरब, यूएई, चीन लगायतका देशले आर्थिक सहयोग गर्ने घोषणा गरेका छन्।
संघका संस्थापक अध्यक्ष उपेन्द्र महतो, प्रमुख संरक्षक बद्री केसीलगायतको उपस्थिति रहेको बैठकले विदेशमा रहेका नेपाली समुदायलाई यो विषम परिस्थितिमा उद्धार तथा राहत अभियानमा जोडिन सबैलाई आह्वान गरेको छ।
साथै, संघले रसुवाको भोटेकोसी नदीमा आएको बाढीका कारण उत्पन्न परिस्थितिलाई मध्यनजर गर्दै सबै निर्धारित कार्यक्रम स्थगित गरेको छ।
