काठमाडौं । १८औँ नाडा अटो शो २०२६ मा सहभागी बैंकहरूले सवारीसाधन खरिद गर्ने ग्राहकलाई लक्षित गर्दै विभिन्न आकर्षक अटो लोन योजना सार्वजनिक गरेका छन् । बैंकहरूले ब्याजदर, कर्जा अवधि, सेवा शुल्क, डाउन पेमेन्ट तथा विद्युतीय सवारीसाधन (ईभी) का लागि विशेष सुविधा दिएका छन् ।
अटो शोमा सरकारी तथा निजी क्षेत्रका १३ वटा वाणिज्य बैंक सहभागी छन् । यी बैंकहरूको अटो लोनको ब्याजदर ४.६६ प्रतिशतदेखि ५.९९ प्रतिशतसम्म रहेको छ । बैंकअनुसार ब्याजदरको प्रकृति, कर्जा अवधि र सेवा शुल्कमा फरक सुविधा दिइएको छ ।
कृषि विकास बैंकले सबैभन्दा कम ४.६६ प्रतिशत ब्याजदरमा अटो लोन उपलब्ध गराउने भएको छ । बैंकले ७ वर्षसम्मको कर्जा अवधि तोकेको छ भने सेवा शुल्क र ब्याजदर प्रिमियममा ३३.३३ प्रतिशत छुट दिने जनाएको छ । ईभी खरिदमा सवारीको मूल्यको ८० प्रतिशतसम्म कर्जा उपलब्ध हुनेछ ।
नेपाल बैंकले ४.९४ प्रतिशत र राष्ट्रिय वाणिज्य बैंकले ५.०२ प्रतिशत ब्याजदरमा अटो लोन दिने भएका छन् । राष्ट्रिय वाणिज्य बैंकको कर्जा ७ वर्षसम्मका लागि उपलब्ध हुनेछ भने अटो शो अवधिमा सेवा शुल्क ०.५० प्रतिशत कायम गरिएको छ ।
नबिल बैंकले ५.१७ प्रतिशत ब्याजदरमा कर्जा उपलब्ध गराउँदै २० प्रतिशत डाउन पेमेन्ट र २० प्रतिशत क्रेडिट कार्डबाट भुक्तानी गरेपछि बाँकी ६० प्रतिशत रकम कर्जामार्फत उपलब्ध गराउने योजना ल्याएको छ ।
एनआईसी एसिया बैंकले ५.९९ प्रतिशत स्थिर ब्याजदरमा ७ वर्षसम्मका लागि कर्जा दिने भएको छ । ईभी खरिदमा ८० प्रतिशतसम्म कर्जा उपलब्ध गराउने बैंकले जनाएको छ ।
ग्लोबल आईएमई बैंकले ईभीका लागि ५.१७ प्रतिशत ब्याजदरमा कर्जा दिने भएको छ । माछापुच्छ्रे बैंकले ५.४५ प्रतिशत ब्याजदरमा १० वर्षसम्मको कर्जा सुविधा दिएको छ भने सेवा शुल्कमा छुट दिएको छ ।
प्रभु, लक्ष्मी सनराइज, कुमारी, नेपाल एसबीआई, सिद्धार्थ र नेपाल इन्भेष्टमेन्ट मेगा बैंकले पनि ५.१३ देखि ५.५४ प्रतिशतसम्मको ब्याजदरमा अटो लोन उपलब्ध गराउने भएका छन् ।
बैंकहरूले ब्याजदर मात्रै नभई कर्जा अवधि, सेवा शुल्क, डाउन पेमेन्ट र ईभी कर्जा सीमामा फरक–फरक सुविधा ल्याएपछि अटो शोमा ग्राहकलाई आफ्नो आवश्यकता र भुक्तानी क्षमताअनुसार कर्जा योजना छनौट गर्ने अवसर मिलेको छ ।
