काठमाडौं। लाईभ नेपाल नेटवर्क प्रा.लि.को आयोजना तथा काठमाडौं महानगरपालिका वडा नं. १६ को सहकार्यमा जनजागृति ज्ञानरश्मि माध्यमिक विद्यालयका विद्यार्थीहरूका लागि सञ्चालन गरिएको पाँचदिने फोटोग्राफी तालिम सम्पन्न भएको छ। मिति २०८३ साल असोज २३ गते आयोजित समापन कार्यक्रममा सहभागी विद्यार्थीहरूलाई प्रमाणपत्र वितरण गर्नुका साथै उत्कृष्ट फोटोग्राफी गर्ने विद्यार्थीहरूलाई पुरस्कार तथा गिफ्ट ह्याम्पर प्रदान गरिएको थियो।
तालिमको समापन कार्यक्रममा काठमाडौं महानगरपालिका वडा नं. १६ का वडा सदस्य तथा प्रमुख अतिथि हरक खातीले विद्यार्थीहरूको क्षमता अभिवृद्धि गर्न फोटोग्राफी तालिम सञ्चालन गरेकोमा लाईभ नेपाल नेटवर्क प्रा.लि.को प्रशंसा गर्नुभयो। उहाँले यस्ता सिर्जनात्मक कार्यक्रमले विद्यार्थीहरूको व्यावहारिक ज्ञान, सीप र प्रतिभा विकासमा महत्त्वपूर्ण योगदान पुर्याउने विश्वास व्यक्त गर्दै प्रमाणपत्र प्राप्त गरेर मात्र सीमित नभई सिकेको सीपलाई व्यवहारमा उतार्न विद्यार्थीहरूलाई आग्रह गर्नुभयो।
कार्यक्रममा लाईभ नेपाल नेटवर्क प्रा.लि.का प्रमुख सल्लाहकार तथा काठमाडौं महानगरपालिकाको विपद् व्यवस्थापनसम्बन्धी सल्लाहकार एवं राष्ट्रिय युवा संघका केन्द्रीय सचिवालय सदस्य गोविन्दप्रसाद धुसालले विद्यार्थीहरूको क्षमता विकासका लागि यस्ता कार्यक्रम निरन्तर सञ्चालन गर्नुपर्ने बताउनुभयो। उहाँले विद्यालयस्तरमा सीपमूलक तथा व्यावहारिक तालिमले विद्यार्थीहरूको भविष्य निर्माणमा सकारात्मक भूमिका खेल्ने धारणा व्यक्त गर्नुभयो।
त्यसैगरी, विद्यालय व्यवस्थापन समितिका सदस्य उद्यम बल्लभ पन्तले तालिमले विद्यार्थीहरूमा नयाँ सीप र सिर्जनशीलताको विकास गर्न सहयोग पुग्ने बताउनुभयो। कराते प्रशिक्षक तथा खेलाडी विदुर कुँवरले पनि फोटोग्राफी तालिमले विद्यार्थीहरूको प्रतिभा प्रस्फुटन गर्न र नयाँ सम्भावनाका ढोका खोल्न मद्दत गर्ने धारणा राख्नुभयो। उहाँ विगत करिब ४० वर्षदेखि कराते खेलमा सक्रिय रहँदै विद्यार्थीहरूलाई समेत प्रशिक्षण दिँदै आउनुभएको छ।
जनजागृति ज्ञानरश्मि माध्यमिक विद्यालयका प्रधानाध्यापक शिवराज पौडेलले विद्यालयमा यस्तो उपयोगी कार्यक्रम सञ्चालन गरेकोमा आयोजकप्रति आभार व्यक्त गर्दै विद्यार्थीहरूलाई तालिमबाट सिकेका सीपलाई निरन्तर अभ्यास गर्न आग्रह गर्नुभयो। विद्यालयका शिक्षक कमल काफ्लेले पनि तालिमले विद्यार्थीहरूको सिकाइ र क्षमता विकासमा सकारात्मक प्रभाव पार्ने बताउनुभयो।
कार्यक्रममा लाईभ नेपाल नेटवर्क प्रा.लि.का अध्यक्ष पुष्करराज पाण्डेले संस्थाले विभिन्न क्षेत्रमा सीपमूलक तथा जनचेतनामूलक कार्यक्रम सञ्चालन गर्दै आएको उल्लेख गर्नुभयो। उहाँले पाँचदिने तालिममा सक्रिय सहभागिता जनाउने विद्यार्थीहरूलाई बधाई दिँदै आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गर्नुभयो। उहाँले विद्यार्थीहरूलाई प्रमाणपत्र वितरण गर्नुभएको थियो।
लाईभ नेपाल नेटवर्क प्रा.लि.की निर्देशक, पत्रकार तथा समाजसेवी सावित्री बस्नेत ‘सबु’ले विद्यार्थीहरूको क्षमता अभिवृद्धि गर्ने उद्देश्यले तालिम सञ्चालन गरिएको बताउनुभयो। उहाँले विद्यार्थीहरूलाई फोटोग्राफीको सैद्धान्तिक ज्ञानसँगै व्यवहारिक अभ्यासको अवसर प्रदान गरिएको र तालिम अवधिमा उनीहरूलाई आफैँ फोटो खिच्न लगाई सीप विकासमा प्रोत्साहित गरिएको जानकारी दिनुभयो।
तालिमका क्रममा विद्यार्थीहरूले खिचेका तस्बिरहरूको मूल्याङ्कन गरी उत्कृष्ट प्रदर्शन गर्ने विद्यार्थीहरूलाई क्रमशः प्रथम, द्वितीय र तृतीय स्थानका लागि छनोट गरिएको थियो। प्रथम स्थानमा सदिक्षा शर्मा, द्वितीय स्थानमा अनिल घर्ती मगर तथा तृतीय स्थानमा इभान्जेलिना ठकुरी र वेविका राना मगर छनोट भएका थिए। उनीहरूलाई पुरस्कार, गिफ्ट ह्याम्पर तथा प्रमाणपत्र प्रदान गरिएको थियो। उत्कृष्ट विद्यार्थीहरूलाई बधाई दिँदै आयोजकले आगामी दिनमा पनि आफ्नो प्रतिभा र सीपलाई निरन्तर निखार्दै लैजान शुभकामना व्यक्त गरेको थियो।
कार्यक्रममा स्वतन्त्र पत्रकार संघ काठमाडौं जिल्ला अध्यक्ष कृष्णराज तिमिल्सिनाले कुशलतापूर्वक कार्यक्रम सञ्चालन गर्नुभएको थियो। उहाँको प्रभावकारी प्रस्तुति र सहजीकरणले समापन कार्यक्रमलाई थप व्यवस्थित बनाएको थियो। तालिममा प्रशिक्षक सागर ताम्राकार र सचित सुनालीले विद्यार्थीहरूलाई फोटोग्राफीसम्बन्धी ज्ञान तथा सीप प्रदान गर्नुभएको थियो।
समापन कार्यक्रममा विद्यालयका स्रोत शिक्षक कपिलजंग पाण्डे, विद्यालय इन्चार्ज दिवसबाबु पोखरेललगायत विभिन्न क्षेत्रका व्यक्तित्व, समाजसेवी तथा पत्रकारहरूको उपस्थिति रहेको थियो। कार्यक्रममा विद्यार्थीहरूको उल्लेख्य सहभागिता रहेको थियो भने ३० जना विद्यार्थीले तालिम पूरा गरी प्रमाणपत्र प्राप्त गरेका थिए।
विद्यार्थीहरूलाई प्रविधि र सिर्जनात्मक सीपसँग जोड्दै व्यावहारिक ज्ञान अभिवृद्धि गर्ने उद्देश्यले सञ्चालन गरिएको उक्त पाँचदिने तालिम उत्साहजनक सहभागिताका साथ सम्पन्न भएको आयोजकले जनाएको छ। लाईभ नेपाल नेटवर्क प्रा.लि.ले आगामी दिनमा पनि विद्यार्थी तथा समुदायको क्षमता विकासमा केन्द्रित यस्ता कार्यक्रमलाई निरन्तरता दिने जनाएको छ।
