काठमाडाैं, ३० भदाै । नेपाल इन्जिनियर्स एसोसिएसनले हालैको जेन–जेड आन्दोलनका क्रममा भएका क्षति मूल्याङ्कन र पुनर्निर्माण प्रयासका लागि निशुल्क प्राविधिक सहयोग दिने घोषणा गरेको छ।
एसोसिएसनका महासचिव बिनोद प्रकाश पण्डितले जारी गरेको प्रेस वक्तव्यअनुसार, भवन मूल्याङ्कन र पुनर्निर्माण कार्यमा एसोसिएसनले आफ्नो प्राविधिक सहयोग निःशुल्क उपलब्ध गराउनेछ। पण्डितका अनुसार, “नेपालका प्राविधिक मानव संसाधनको मेहनत, श्रम र विशेषज्ञता १९९० र २०७२ सालका भूकम्पमा क्षतिग्रस्त भौतिक संरचनाको पुनर्निर्माणमा महत्वपूर्ण भूमिका खेलेको थियो। यस समर्थनलाई आगामी दिनमा पनि निरन्तरता दिन एसोसिएसन इच्छुक छ।”
एसोसिएसनले आइतबारदेखि सर्वोच्च अदालत, काठमाडौं जिल्ला अदालत र नेपाल बार एसोसिएसनका भवनहरूको प्रारम्भिक मूल्याङ्कन सुरु गरेको एसोसिएसनका अध्यक्ष सुबास चन्द्र बरालले जानकारी दिए।
बरालले थपे, “मूल्याङ्कनले तत्काल निरीक्षण, जोखिम मूल्याङ्कन, वैकल्पिक व्यवस्थापन योजना र पुनर्निर्माण बोलपत्रका लागि व्यवहार्यता अध्ययन समावेश गर्नेछ।”
यस पहलले आन्दोलन र अन्य प्राकृतिक क्षतिको प्रभावबाट प्रभावित भवनहरूको द्रुत र व्यवस्थित पुनर्निर्माणमा ठूलो योगदान पुग्ने अपेक्षा गरिएको छ।
