नेपाली कांग्रेसका नेता नैनसिंह महरले मुलुकको वर्तमान संकट समाधानका लागि तत्काल राष्ट्रिय संवाद आवश्यक रहेको बताउनुभएको छ। उहाँले अन्यौलग्रस्त लोकतान्त्रिक प्रक्रियालाई सुचारु गर्न कि त फागुन २१ गतेका लागि घोषित निर्वाचनका माध्यमले नयाँ जनमत लिने वा संसद पुनःस्थापना गरेर संविधानलाई सही मार्गमा ल्याउने विषयमा राष्ट्रिय संवाद मार्फत निर्क्यौल गर्नुपर्नेमा जोड दिनुभएको छ।
आज स्कुल अफ डेमोक्रेसीले राजधानीमा आयोजित ‘वर्तमान संकट र समाधान’ विषयक विमर्श कार्यक्रममा बोल्दै नेता महरले वर्तमान राजनीतिक अस्थिरता, आर्थिक मन्दी र संस्थागत भ्रष्टाचारले नागरिकमा गहिरो निराशा छाएको उल्लेख गर्नुभयो।
महरले लाखौं युवा रोजगारीका लागि विदेशिन बाध्य हुनु र महँगीले आम नागरिकको जीवनयापन कष्टकर बन्नु चिन्ताको विषय भएको बताउनुभयो। “राजनीतिक दलहरूको आन्तरिक लोकतन्त्र कमजोर हुँदा र आन्तरिक कलहमा फस्दा जनतामा व्यवस्थाप्रति नै वितृष्णा जाग्नु स्वाभाविक हो,” उहाँले भन्नुभयो। हालै देखिएका युवा आक्रोश र सडक प्रदर्शनहरूले पनि राजनीतिक नेतृत्वलाई गम्भीर हुन सचेत गराएको उहाँको भनाइ थियो।
जनतामा गुमेको आत्मविश्वास जगाउन र राष्ट्र पुनर्निर्माणको अभियान थाल्न सुशासन स्थापनाका लागि भ्रष्टाचार विरुद्धको अभियान थाल्नुपर्नेमा महरले जोड दिनुभयो। उहाँले भन्नुभयो, “भ्रष्टाचार देशको सबैभन्दा ठूलो शत्रु हो, जबसम्म यसलाई जरैदेखि उखेल्न सकिँदैन, तबसम्म राष्ट्र निर्माणको कुरा गर्नु निरर्थक हुन्छ।”
भ्रष्टाचार अन्त्यका लागि महरले २०१८ सालदेखि आजसम्म सार्वजनिक पदमा बसेकाहरूको सम्पत्ति छानबिनका लागि अधिकार सम्पन्न उच्चस्तरीय समिति बनाउनु पर्ने माग गर्नुभयो। ठूला काण्डहरूमा समेत राजनीतिक संरक्षण हुने गरेकाले आमजनताको राज्य संयन्त्रमाथिको विश्वास गुम्दै गएको भन्दै उहाँले वर्तमान सरकार परवाह नगरी अगाडि बढेमा जनताले अस्वीकार गर्ने चेतावनी दिनुभयो।
नेता महरले लोकतान्त्रिक व्यवस्थाका आधारस्तम्भ राजनीतिक दलहरू नै भएकाले राष्ट्रपतिले अन्तरिम सरकार प्रमुखसहित सबै राजनीतिक दलहरूलाई समावेश गरेर राष्ट्रिय संवादको आयोजना गर्नुपर्ने सुझाव दिनुभयो। यस संवादले नै फागुन २१ गतेका लागि घोषित निर्वाचनको वातावरण निर्माण गर्न वा अन्य विकल्पबारे निर्णय लिन मद्दत पुग्ने उहाँको तर्क थियो।
उहाँले आफू सदैव जनताले खोजेको परिवर्तनको पक्षमा रहेको बताउनुभएको छ।
