काठमाडौँ: नेपालको मौलिक कृषि प्रणाली र लोपोन्मुख बीउबिजनको जगेर्ना गर्न ‘रैथाने अभियान’ ले माघ १ गते भृकुटी मण्डपमा विशाल मेलाको आयोजना गर्ने भएको छ। यो मेला केवल प्रदर्शनी मात्र नभई आगामी दिनमा रैथाने कृषिलाई कसरी अगाडि बढाउने भन्ने कार्ययोजना तय गर्ने थलो समेत बन्नेछ।
मेलाका प्रमुख सल्लाहकार डा. आलोक पर्साईले युवा सहभागितालाई जोड दिँदै भन्नुभयो:
“अहिलेको आवश्यकता युवालाई माटो र मौलिकतासँग जोड्नु हो। यो बृहत् मेलाले युवाहरूलाई आधुनिक प्रविधिसँगै रैथाने कृषिको व्यावसायिक सम्भावना बुझाउन ठूलो मद्दत गर्नेछ।”
प्रचारप्रसार संयोजक एवं अभियानकर्मी राम चौहानले मेलामा नौलो प्रयोग गर्न लागेको जानकारी दिनुभयो। उहाँले आफ्नो प्रतिबद्धता दोहोर्याउँदै भन्नुभयो:
“चियाको राजधानी इलामको वास्तविक चियाको बोट नै प्रदर्शनीमा राखेर हामी नागरिकलाई मौलिक उत्पादनप्रति सचेत गराउँदैछौँ। रैथाने उत्पादनलाई ब्रान्डिङ गर्न यो मेला कोशेढुङ्गा साबित हुनेछ।”
अभियानमा सक्रिय पत्रकार एवं अभियान्ता पुष्कर राज पाण्डेले उपभोक्ताको चेतनास्तर वृद्धिमा जोड दिनुभयो। उहाँले भन्नुभयो:
“हामीले के खाइरहेका छौँ र हाम्रो रैथाने उत्पादन कति पोषिलो छ भन्ने बुझ्न जरुरी छ। माघ १ गतेको कार्यक्रममा सहभागी भएर रैथाने वस्तुहरूको प्रयोग बढाउन म सबैमा हार्दिक अपिल गर्दछु।”
