काठमाडौं । आगामी फागुन २१ गते हुने प्रतिनिधिसभा सदस्य निर्वाचनलाई सुरक्षित र व्यवस्थित बनाउन निर्वाचन आयोगले सुरक्षा व्यवस्थासँगै स्वास्थ्य तयारीलाई पनि विशेष प्राथमिकतामा राखेको छ।
यसपटक निर्वाचनलाई केवल राजनीतिक प्रक्रिया मात्र नभई जनस्वास्थ्य व्यवस्थापनसँग जोडिएको संवेदनशील कार्यक्रम का रूपमा लिइएको देखिएको छ ।
मतदानका दिन लाखौँ नागरिक एकैपटक घरबाहिर निस्कने भएकाले सम्भावित स्वास्थ्य जोखिम न्यूनीकरण गर्न आयोगले देशभर ‘हेल्थ अलर्ट’ लागू गरेको हो ।
निर्वाचन आयोगका अनुसार मतदानस्थलमै प्राथमिक उपचार सेवा उपलब्ध गराइनेछ भने आकस्मिक बिरामी, बेहोस हुने, रक्तचाप, मुटुसम्बन्धी समस्या वा मानसिक तनावका घटना तत्काल व्यवस्थापन गर्न स्वास्थ्यकर्मी तयारी अवस्थामा रहनेछन् ।
स्वास्थ्य तथा जनसङ्ख्या मन्त्रालयमार्फत सबै अस्पताललाई चिकित्सक, नर्स, एम्बुलेन्स र अत्यावश्यक औषधि पर्याप्त राख्न निर्देशन दिइएको छ। साथै स्थानीय तहहरूलाई पनि स्वास्थ्य सेवा समन्वयमा सक्रिय भूमिका खेल्न भनिएको छ।
निर्वाचनका क्रममा कर्मचारी, सुरक्षाकर्मी र मतदातामा देखिन सक्ने थकान, भीड व्यवस्थापन र मानसिक दबाबलाई समेत ध्यानमा राख्दै स्वास्थ्य सहायता प्रणाली मजबुत बनाइएको आयोगले जनाएको छ ।
सरकारले मतदानअघि र पछि गरी तीन दिन सार्वजनिक बिदा दिने निर्णयसमेत गरी सकेको छ ।
