मध्यविन्दु । यातायात व्यवस्था कार्यालय नवलपरासी (बर्दघाट सुस्तापूर्व) ले चालु आर्थिक वर्षको ९ महिनामा २३ करोड ३० लाख १६ हजार २२ रुपैयाँ राजस्व सङ्कलन गरेको छ । चालु आवको साउनदेखि चैत मसान्तसम्म सवारीसाधन कर, चालक अनुमतिपत्र र सवारी दर्तालगायतका शीर्षकमा उक्त रकम सङ्कलन भएको हो ।
कार्यालय प्रमुख टेकबहादुर नेपालीका अनुसार सबैभन्दा बढी सवारीसाधन करबाट १९ करोड २४ लाख २२ हजार २७० रुपैयाँ उठेको छ । यस्तै, सवारी चालक अनुमतिपत्र एवं सवारी दर्ता किताबबापत ३ करोड ७४ लाख ९२ हजार २३४ रुपैयाँ, यातायात क्षेत्रको आम्दानीबापत २३ लाख २९ हजार ९९० र अन्य प्रशासनिक सेवा शुल्कबापत ७ लाख ७१ हजार ५२८ रुपैयाँ सङ्कलन भएको छ ।
कर सङ्कलनलाई प्रभावकारी बनाउन कार्यालयले चैत महिनामा विशेष अभियान नै सञ्चालन गरेको थियो । “यो अभियानअन्तर्गत बिलबुक नवीकरण, जाँचपास, रुट परमिट तथा चालक अनुमतिपत्रको जाँचलाई प्राथमिकता दिइएको थियो,” प्रमुख नेपालीले भने, “प्रदेश सरकारको लक्ष्यअनुसार कर प्रक्रियालाई चुस्त बनाउँदा राजस्व सङ्कलनमा सुधार आएको हो ।”
सेवाग्राहीको चापलाई मध्यनजर गर्दै कार्यालयले छुट्टै काउन्टर र अतिरिक्त कर्मचारीको व्यवस्था गरेको सूचना अधिकारी टेकनारायण तिवारीले जानकारी दिए । उनले सेवा लिने प्रक्रियालाई छिटो र पारदर्शी बनाउन कागजात तथा आवश्यक जानकारी सहजै उपलब्ध गराउने व्यवस्था मिलाइएको बताए ।
गत आव २०८१/८२ को सोही अवधिमा कार्यालयले २३ करोड ५४ लाख ३० हजार ९८० रुपैयाँ राजस्व सङ्कलन गरेको थियो । अघिल्लो वर्षको तुलनामा यस वर्षको सङ्कलन रकम केही न्यून देखिए पनि चैतको विशेष अभियानपछि राजस्वको दरमा वृद्धि भएको कार्यालयले जनाएको छ ।
