आइतबार बिहान एक विशेष समारोहका बीच नवनिर्मित मन्दिर तथा प्रवेश द्वार (गेट) को उद्घाटन गर्दै कामपा १५ का वडा अध्यक्ष ईश्वरमान डंगोलले उक्त विकास कार्यको प्रशंसा गर्नुभयो। कार्यक्रममा प्रमुख अतिथिको आसनबाट बोल्दै डंगोलले भन्नुभयो, “मनमा इच्छाशक्ति भयो भने असम्भवलाई पनि सम्भव बनाउन सकिन्छ भन्ने उदाहरण यो १३ फिटको बाटोले दिएको छ। विकासका लागि हजारौँ हातहरू मिल्नुपर्छ भन्ने सन्देश आनन्द नगरले दिएको छ।”
स्थानीय घरधनीलाई सम्मान बाटो विस्तारका लागि आफ्नो जग्गाबाट दायाँ-बायाँ गरी ५ फिट जग्गा छोडेर सहयोग गर्ने स्थानीय घरधनीहरूलाई कार्यक्रममा विशेष सम्मान गरिएको थियो। वडा अध्यक्ष डंगोलले उहाँहरूलाई प्रशंसा पत्र र मायाको चिनो प्रदान गर्दै ‘विकासप्रेमी नागरिक’ को संज्ञा दिनुभयो।
विजु श्रेष्ठको संयोजकतामा सफलता वडा कार्यालयको सक्रियता र विजु श्रेष्ठको विशेष संयोजकतामा सम्पन्न यस आयोजनाले सो क्षेत्रको ढल व्यवस्थापन र पिच कार्यलाई समेत पूर्णता दिएको छ। दशकौँदेखि ओझेलमा परेको यो बाटो फराकिलो भएपछि स्थानीयबासी हर्षित भएका छन्।
विशिष्ट व्यक्तित्वहरूको उपस्थिति उद्घाटन समारोहमा पूर्व सांसद राजेन्द्र प्रसाद पाण्डे, वडा सदस्यहरू, वडा सचिव प्रमोद अधिकारी, वडा अधिकृत दिनानाथ सापकोटा, पूर्व ई. सुमन बाघ श्रेष्ठ लगायतका व्यक्तित्वहरूको उपस्थिति रहेको थियो।
कार्यक्रमको अन्त्यमा आनन्द नगर टोल सुधार समितिका अध्यक्ष सरोज कुमार डंगोल र उपभोक्ता समितिका अध्यक्ष कमल खनालले विकास निर्माणमा साथ दिने वडा कार्यालय, प्राविधिक टोली र स्थानीयबासीहरूलाई धन्यवाद ज्ञापन गर्नुभएको थियो।
