काठमाडौं । प्रहरी हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले आफूविरुद्ध केही मिडियाले गलत प्रचार गरिरहेको बताएका छन् । पार्टीका प्रवक्ता मनिष झासँगको भेटमा रविले आफू हिरासतमा रहेको माैकामा सिंगाे राज्य र केही मिडियाले भ्रमपूर्ण प्रचार गरिरहेको बताएका हुन् ।
रविसँगको भेटबारे झाले समाजिक सञ्जालमार्फत जानकारी दिँदै लेखेका छन्, ‘अहिले उहाँलाई एक शब्द, वाक्य बोल्न दिने त परेको कुरा अनुहारको भावसमेत नदेखियोस् भनेर थुनेररछेकेर राखिएको छ। यसरी थुनिएको मौका छोपेर कायरतापूर्वक गरिएको ‘मिडिया ट्रायल’ र संगठित मिडिया आक्रमणको तथ्य प्रमाणसहितको जवाफ दिन पाए त हुन्थ्यो तर यतिबेला धैर्यतापूर्वक प्रतिक्षा गर्नुको विकल्प उहाँसँग छैन। पटकपटक गलत समाचार लेखेर माफी माग्दै आएकाहरुलाई जवाफ दिन होइन उहाँ आमनागरिकलाई भ्रम नपरोस् भन्नेमा चिन्तित हुनुहुन्छ।’
साथै रविले जिल्ला सरकारी वकीलको कार्यालय, रुपन्देहीमा दिएको बयानलाई गलत प्रचार गरिएको पनि बताएका छन् । उनले विषयलाई बङ्ग्याएर केही मिडियाहरुले झुटको खेती गरेको आरोप समेत लगाएका छन् ।
झाले रविलाई उदृत गर्दै लेखेका छन्, ‘पहिलो कुरा, उक्त चेकसहितको सवालका लागि एकैछिन बुझ्नुपर्छ भनेको हुँ। पुरानो कुरा भएकाले बुझ्न दुई/तीन कल वयान लिनेकै अगाडि गरेको पनि हुँ। सबै कलको समय जोड्दा ५ देखि ७ मिनेट मात्र भयो होला। त्यतिन्जेल अरु सवालहरुमा काम निरन्तर भयो। काम रोकिएको र त्यसैका कारण बयानमा समय लागेको कुरा गलत हो, झुटो हो।’
रविले जिल्ला सरकारी वकीलको कार्यालय, रुपन्देहीबाट भएको गैरकानूनी क्रियाकलापप्रति प्रधानमन्त्री र महान्यायाधीवक्ताको गम्भीर ध्यानाकर्षण समेत गराएको झाले उल्लेख गरेका छन् ।
