पोखरा– पोखराको पृथ्वीनारायण क्याम्पसमा १६ वर्षपछि स्वतन्त्र विद्यार्थी युनियनको चुनाव हुँदै गर्दा नेपाली कांग्रेसको भ्रातृ संगठन नेपाल विद्यार्थी संघले नेतृत्व हत्याउने रणनीति बुनेको थियो । धेरै समूहमा विभक्त नेविसंघले यसपालि सुरुमै मिलेर संगठन दर्ता गराएका थियो ।
स्वतन्त्र समूहबाट पनि उम्मेदवारी दर्ता गराएका कारण पृथ्वीनारायण क्याम्पसमा अनेरास्ववियुको विरासत भत्किने आँकलन पनि गरिएको थियो । उता अनेरास्ववियु भने आफैँले जित्नेमा ढुक्क देखिन्थ्यो । २ पटकसम्म स्थगित भएर चैत १० मा भएको निर्वाचनमा उही अनेरास्ववियुले विजयको झन्डा गाड्यो ।
निर्वाचनमा कांग्रेसनिकट नेपाल विद्यार्थी संघ, समाजवादी मोर्चा, तथा स्वतन्त्र उम्मेदवारहरूले अनेरास्ववियूको प्रभाव भत्काउने प्रयास गरेका थिए । तर, ती सबै चुनौतीहरू पार गर्दै विष्णु पोखरेल नेतृत्वको अनेरास्ववियु प्यानलले विजय हासिल गरेको छ ।
अध्यक्ष पदमा विष्णु पोखरेलले १ हजार १ सय ५ मत प्राप्त गरी दोब्बरभन्दा बढी मतान्तरसहित जित हासिल गरेका छन् ।
उनका प्रतिद्वन्द्वी नेपाल विद्यार्थी संघका सुशील न्यौपानेले ५ सय ३ मत प्राप्त गरे । स्वतन्त्र उम्मेदवार विप्लवी न्यौपानेले ४ सय ६० मत ल्याइन् । माओवादीनिकट अखिल क्रान्तिकारीका नवीन अधिकारीले २२३ मत पाए । समाजवादी मोर्चाका सन्तोष पौडेलले १ सय ६ मत ल्याए ।
९ हजारभन्दा बढी विद्यार्थी अध्ययनरत रहेको भनिएको पृना क्याम्पसमा ७ हजार ४ सय विद्यार्थीले परिचय पत्र लगेका थिए । तर २८ सय ९७ मत मात्र खसेको थियो । कूल मतदातामध्ये ३०.१२ प्रतिशत मात्रै मतदानमा सहभागी भएका थिए, जुन क्याम्पसको इतिहासमै सबैभन्दा कम हो ।
पृथ्वीनारायण क्याम्पस विद्यार्थी नेता उत्पादन गर्ने संस्था हो । यहाँका पूर्वस्ववियु सभापतिहरू विभिन्न उच्च पदमा पुगिसकेका छन् । पूर्वप्रदेश प्रमुख सोमनाथ प्यासी, पूर्वमुख्यमन्त्री खगराज अधिकारी, स्वर्गीय पूर्वमन्त्री रवीन्द्र अधिकारी, पोखराका मेयर धनराज आचार्य, राजनीतिक विश्लेषक झलक सुवेदी, पूर्व मन्त्री पदम गिरी लगायतले यही क्याम्पसबाट नेतृत्व गरेका थिए । उनीहरू सबै एमालेनिकट अनेरास्ववियुबाटै चुनाव जितेका थिए ।
स्ववियु निर्वाचन भएका क्याम्पसहरुको मत परिणाम अनुसार प्रदेशमा नेपाली कांग्रेसनिकट नेपाल विद्यार्थी संघ बलियो देखिएको छ । ११ जिल्ला रहेको गण्डकीमा मनाङ र पर्वतबाहेक ९ जिल्लाका त्रिवि अन्तर्गतका क्याम्पसमा निर्वाचन भएको छ ।
पछिल्लो तथ्यांक अनुसार नेविसंघ १४, अनेरास्ववियु ११, अनेरास्ववियु क्रान्तिकारी ३, छैटौँ र स्वतन्त्र १/१ क्याम्पसमा विजयी भएका छन् ।
प्रदेश राजधानी कास्कीको पोखरामा पृथ्वीनारायण क्याम्पस (पृना) सँगै इन्जिनियरिङ अध्ययन संस्थान पश्चिमाञ्चल क्याम्पस, चिकित्सा शास्त्र अध्ययन संस्थान पोखरा नर्सिङ क्याम्पस, वन विज्ञान अध्ययन संस्थान पोखरा क्याम्पसमा स्ववियु निर्वाचन भएको छ ।
इन्जिनियरिङ अध्ययन संस्थान पश्चिमाञ्चल क्याम्पसमा स्वतन्त्र उम्मेदवार विजयी बने । यहाँ अघिल्लो विरासत जोगाउन तल्लीन विद्यार्थी संगठनहरूलाई छक्याउँदै दिँदै स्ववियु अध्यक्षमा स्वतन्त्र उम्मेदवारी दिएका प्रकाश धामी विजयी भएका हुन् ।
धामीले अनेरास्ववियुका अनुप न्यौपाने, अखिल क्रान्तिक्रारीका आदर्श महत क्षेत्री र नेविसंघका सौगात पण्डितलाई पराजित गरे । सचिवमा क्रान्तिकारीका हरिकृष्ण खड्का विजयी बने । उनले अनेरास्ववियुका विनायक भुंवाजीलाई पछि पारे ।
पोखराकै नर्सिङ क्याम्पसमा स्वतन्त्र विद्यार्थी युनियन निर्वाचनमा एमालेनिकट अनेरास्ववियुको प्यानल विजयी भयो । मतगणनामा अनेरास्ववियुकी प्रतिभा भण्डारी अध्यक्षमा निर्वाचित भएकी हुन् । सचिवमा अखिलकै सलिना श्रेष्ठ र कोषाध्यक्षमा कुसुम गौतम चुनिए ।
वन विज्ञान अध्ययन संस्थानमामा अनेरास्ववियुका अभिषेक शर्मा विजयी भए । उनले नेविसंघका उत्तम हुमागाईंलाई पराजित गरे । सचिवमा अखिल क्रान्तिकारीका गौरव खड्का विजयी भए । कोषाध्यक्षमा अनेरास्ववियुकी प्रतिमा श्रेष्ठ विजयी भइन् । यहाँ दुई अखिलले गठबन्धन गरेका थिए । पोखराकै जनप्रिय बहुमुखी क्याम्पसमा अर्को मिति तय गरिएको छैन ।
स्याङ्जामा स्ववियुको निर्वाचन भएका ६ क्याम्पसमध्ये ४ वटामा नेविसंघ र २ वटामा अनेरास्ववियू विजयी भएका छन् । जिल्ला सदरमुकाम स्याङ्जामा रहेको त्रिभुवन आदर्श बहुमुखी क्याम्पसमा नेविसंघका देवदत्त सुवेदीको प्यानल निर्वाचित भएको छ । जिल्लामा धेरै मतदाता रहेको वालिङ बहुमुखी क्याम्पसमा नेविसंघका निरज श्रेष्ठ अध्यक्ष चुनिए । सचिवमा अनेरास्ववियूकी बिना रेग्मीबाहेक सबै पदमा नेविसंघ विजयी भएको छ ।
गल्याङको मालुंगा सार्वजनिक बहुमुखी क्याम्पसमा नेविसंघका गोविन्द भण्डारी र चापाकोटमा रहेको राधादामोदर संस्कृत विद्यापीठमा नेविसंघका रविन भट्टराई सभापतिमा चयन भए । दुवै क्याम्पसमा सहमतिका आधारमा स्ववियु पदाधिकारी छानिएका हुन् ।
फेदीखोलामा रहेको सिद्धार्थ सामुदायिक बहुमुखी क्याम्पसको सभापतिमा अनेरास्ववियूकी प्रतीक्षा गोदारको प्यानल विजयी भएको छ । कालीगण्डकीको मिर्मी बहुमुखी क्याम्पसमा मुना न्यौपाने दोस्रो कार्यकालका लागि निर्विरोध निर्वाचित भएकी छिन् । गल्याङको गल्याङ बहुमुखी क्याम्पसमा विवादका कारण निर्वाचन प्रक्रिया अवरुद्ध छ ।
लमजुङका ४ क्याम्पसमा नेविसंघ र एउटामा अनेरास्ववियु विजयी भएका छन् । सुन्दरबजार नगरपालिका ९ भोटेओडार स्थित भक्ति आदर्श बहुमुखी क्याम्पस, वडा नम्बर ७ सुन्दरबजारस्थित मातृभूमि बहुमुखी क्याम्पस र मध्यनेपाल नगरपालिका ३ सोतीपसलस्थित मंगला क्याम्पसमा नेविसंघको प्यानलै विजयी भएको हो ।
भक्ति आदर्श क्याम्पसमा नेविसंघका उम्मेदवार सुशील अधिकारी सभापतिमा निर्वाचित भए । मातृभूमि बहुमुखी क्याम्पसमा नेविसंघका विशाल थापाले जित हासिल गरे । लमजुङको सुन्दरबजार स्थित कृषि र पशु विज्ञान अध्ययन संस्थान (लमजुङ क्याम्पस) को स्ववियु निर्वाचनमा नेविसंघको प्यानलै विजयी भएको छ । यहाँ नेविसंघका असिम वस्ती विजयी भएका हुन् ।
मंगला क्याम्पसमा नेविसंघका रामचन्द्र खनालको सभापतित्वमा प्यानलै सर्वसम्मत भएको थियो । लमजुङ सदरमुकाम बेंसीसहरमा रहेको मस्र्याङ्दी बहुमुखी क्याम्पसमा अनेरास्ववियुको जित भएको छ । नेविसंघका पूर्णबहादुर गुरुङलाई हराउँदै अनेरास्ववियुका मदनकुमार विक निर्वाचित भएका हुन् ।
तनहुँका २ क्याम्पसमा अनेरास्ववियु विजयी हुँदा नेविसंघ र अनेरास्ववियु (क्रन्तिकारी) ले एक÷एक वटा अध्यक्ष जितेका छन् । खैरैनीटारको भानुभक्त बहुमुखी क्याम्पस र भीमादको जनज्योति क्याम्पसमा अनेरास्ववियुले जित्दा दमौलीको आदिकवि भानुभक्त क्याम्पसमा नेविसंघ र आँबुखैरेनी क्याम्पसमा क्रान्तिकारीले जित हात पारे ।
भानुभक्तमा अनेरास्ववियुको मीनबहादुर थापा र जनज्योतिमा अनेरास्ववियुकै विप्लप भण्डारीले जितेका हुन् । आदिकवि भानुभक्तमा नेविसंघका अनुप आले र आँबुखैरेनीमा अनेरास्ववियु क्रान्तिकारीका निशान मगर चुनिएका छन् ।
बागलुङमा ४ क्याम्पसमा भएको स्ववियु निर्वाचनमा नेविसंघ, अनेरास्ववियु, अनेरास्ववियु (क्रान्तिकारी) र अखिल छैटौँले एक/एक स्थानमा अध्यक्ष जितेका छन् । जिल्लाको शान्तिदीप बहुमुखी क्याम्पसमा नेविसंघकी विपना परियार निर्वाचित भइन् ।
धवलागिरि बहुमुखी क्याम्पसको सभापतिमा अखिल संयुक्त प्यानलबाट आस्मीन शेख विजयी भइन् । शेखले नेपाल विद्यार्थी संघकी सृष्टि आचार्यलाई परजित गर्दै विजयी भएकी हुन् । गलकोट हटियास्थित गलकोट बहुमुखी क्याम्पसमा माओवादी केन्द्र निकट क्रान्तिकारीका प्रभात साहनी निर्वाचित भएका हुन् । साहनीले नेविसंघ, अनेरास्ववियु र अखिल छैठौंको संयुक्त प्यानलकी रेनुका परियारलाई पराजित गरेका हुन् ।
बागलुङको बरेङ बजार स्थित सर्वोदय क्याम्पसमा छैटौँका मोहराज पौडेल नेतृत्वको प्यानल निर्विरोध निर्वाचित भएको हो । म्याग्दीको २ क्याम्पसमध्ये नेविसंघ र अनेरास्ववियुले एक/एकमा जितेका छन् । म्याग्दी सदरमुकामको म्याग्दी बहुमुखी क्याम्पसमा नेविसंघका संगम चोखाल विजयी बन्दा मंगल शिक्षा क्याम्पसमा अनेरास्ववियुका एल्डिन पुन अध्यक्ष बनेका हुन् ।
गोरखाको गोरखा क्याम्पसमा अनेरास्ववियु क्रान्तिकारीका सुलभ अम्गाईं सभापतिमा विजयी बन्दा द्रव्य शाह क्याम्पसमा नेविसंघका अविन श्रेष्ठको नेतृत्वमा स्ववियु समिति निर्वाचित भएको हो । नवलपुरका २ क्याम्पसमा नेविसंघले सभापति जितेको छ ।
सूर्यभक्त पतनादेवी मेमोरियल कलेजमा श्यामकुमार बाचे र कालिका संस्कृत विद्यापीठमा अनुप भण्डारी सभापतिमा निर्वाचित भए । मुस्ताङको तेजनिरला क्याम्पसमा अनेरास्ववियुकी अञ्जु परियार अध्यक्ष चुनिएकी छन् ।
