काठमाडौँ । माघे सङ्क्रान्तिको अवसर पारेर ‘लाइफ नेपाल नेटवर्क मिडिया’को पहलमा सामाजिक संस्था ‘रक्षा नेपाल’मा आश्रित बालबालिकाहरूलाई जिन्सी तथा नगद सहयोग हस्तान्तरण गरिएको छ।
विगत लामो समयदेखि सामाजिक कार्यमा सक्रिय युवा समाजसेवी तथा लाइफ नेपाल नेटवर्क प्रालिका अध्यक्ष पुष्कर राज पाण्डेको विशेष समन्वय र नेतृत्वमा उक्त सहयोग उपलब्ध गराइएको हो। पाण्डेले विभिन्न संघसंस्थाहरूसँग सहकार्य गर्दै नेतृत्वदायी भूमिकामा रहेर समाजसेवा गर्दै आउनुभएको छ।
सहयोग कार्यक्रम अन्तर्गत डल्लु निवासी समाजसेवी मिन बहादुर लामाले बालबालिकाहरूका लागि ५ हजार ५ सय रुपैयाँ नगद हस्तान्तरण गर्नुभएको थियो। त्यसैगरी, पूर्व वडा अध्यक्ष एवं समाजसेवी मनोज घिमिरेको विशेष सहयोगमा बालबालिकाहरूका लागि पनिर, दूध र घिउ उपलब्ध गराइएको थियो।
परम्परागत स्वाद र संस्कृतिको जगेर्ना गर्ने उद्देश्यले ‘टोखा परम्परागत चाकु संरक्षण समाज’का अध्यक्ष कृष्ण बहादुर श्रेष्ठले बालबालिकाहरूका लागि चाकु र तिलको लड्डु प्रदान गर्नुभएको थियो।
आफ्नो पर्वको खुसी बालबालिकाहरूसँग साट्न पाएकोमा सहयोगी व्यक्तित्वहरूले खुसी व्यक्त गरे भने रक्षा नेपालको टोलीले सम्पूर्ण सहयोगी मनहरूलाई धन्यवाद ज्ञापन गरेको छ।
