काठमाडौं । अमेरिकी राष्ट्रपति डोनाल्ड ट्रम्पले इरानविरुद्धको युद्ध अझै समाप्त नभएको भन्दै कुनै बिन्दुमा इरानमाथि पुनः कडा प्रहार गर्नुपर्ने अवस्था आउन सक्ने चेतावनी दिएका छन् । उनले युद्ध ‘धेरै चाँडै’ अन्त्य हुने दाबीसमेत गरेका छन् ।
अमेरिकाको आयोवा राज्यस्थित डुबुक सहरमा रिपब्लिकन पार्टीका समर्थकलाई सम्बोधन गर्दै ट्रम्पले थप मानवीय क्षति रोक्न आफूले युद्ध अन्त्य गर्ने प्रयास गरिरहेको बताए ।
‘तर कुनै बिन्दुमा हामीले उनीहरूलाई कडा प्रहार गर्नुपर्ने हुन्छ,’ उनले भने ।
ट्रम्पले इरानको आणविक प्रशोधन क्षमता पूर्ण रूपमा ध्वस्त पारिएको दाबी गर्दै इरानको नौसेना, वायुसेना र हवाई प्रतिरक्षा राडार प्रणालीसमेत नष्ट गरिएको बताए । इरानका नेतृत्वलाई लक्षित कारबाहीबारे बोल्दै उनले भने, ‘नेतृत्वमाथि हामीले केही बढी नै गरेका हुन सक्छौँ, अब वार्ता गर्ने कोही बाँकी छैन।’
इरानले युद्ध सुरु गरेको ट्रम्पको आरोप
ट्रम्पले इरानले सन् १९७९ को इस्लामिक क्रान्तिपछि अमेरिकामाथि निरन्तर आक्रमण गर्दै आएको आरोप लगाए । उनले सन् २००० मा यमनको अदन बन्दरगाह नजिक अमेरिकी युद्धपोत यूएसएस कोलमाथि भएको आक्रमण र इराकलगायतका देशमा अमेरिकी सेनालाई लक्षित सडकछेउका बम विस्फोटमा समेत इरानलाई दोष दिए ।
यूएसएस कोलमाथिको आक्रमणको जिम्मेवारी अलकायदाले लिएको थियो ।
ट्रम्पले आफ्नो पहिलो कार्यकालमा सन् २०२० मा बग्दादमा अमेरिकी कारबाहीमा मारिएका इरानी सैन्य कमान्डर कासिम सुलेमानीलाई सडकछेउका बम आक्रमणसँग जोड्दै उनको हत्या त्यसको जवाफ भएको बताए ।
‘उनीहरूले युद्ध सुरु गरेका हुन्, हामीले होइन। हामी यसलाई अन्त्य गर्दैछौँ र उनीहरूलाई नराम्ररी पराजित गरिरहेका छौँ,’ ट्रम्पले भने ।
पेट्रोलको मूल्य बढे पनि सुरक्षा महत्त्वपूर्ण
युद्धका कारण पेट्रोलको मूल्य बढेको विषयमा ट्रम्पले अमेरिकी सुरक्षाका लागि त्यसलाई ‘तिर्नुपर्ने निकै सानो मूल्य’ भएको बताए । उनले पेट्रोलको मूल्य चाँडै घट्ने दाबी पनि गरे ।
अमेरिकी मध्यावधि निर्वाचन हुन एक दिन बाँकी रहँदा ट्रम्पले युद्ध सुरु गर्ने आफ्नो निर्णयको बचाउ गरेका हुन् । उनले इरानलाई विश्वकै प्रमुख आतंकवाद प्रायोजक राष्ट्र भन्दै अमेरिकाले आफ्नो देशलाई त्यसबाट सुरक्षित राखेको दाबी गरे ।
