काठमाडाैं । अबदेखि सेयर बजारमा लगानीकर्ताले खातामा पर्याप्त रकम भए मात्र सेयर खरिद गर्न सक्ने व्यवस्था लागू हुने भएको छ। नेपाल धितोपत्र बोर्ड (सेबोन) ले आर्थिक वर्ष २०८२/८३ को नीति तथा कार्यक्रम सार्वजनिक गर्दै यस्तो व्यवस्था ल्याउने तयारी गरेको हो।
बोर्डले अब लगानीकर्ताको ट्रेडिङ म्यानेजमेन्ट सिस्टम (TMS) लाई बैंक खातासँग लिङ्क गरिने स्पष्ट पारेको छ। यसका अनुसार दोस्रो बजारमा सेयर खरिद गर्दा बैंक खातामा पैसा नभए खरिद आदेश स्वीकृत नहुनेछ।
यो व्यवस्थाले सेयर बजारमा उधारोमा कारोबार गर्ने प्रचलन अन्त्य गर्नेछ। अबदेखि कुनै पनि कारोबार अघि लगानीकर्ताले खातामा रकम सुनिश्चित गर्नुपर्नेछ।
सेबोनका अनुसार, यस्तो प्रणालीले सेयर बजारमा पारदर्शिता, जवाफदेहिता र जोखिम नियन्त्रण बढाउनेछ। यो कदमले बजारमा वित्तीय अनुशासन ल्याउने, विवाद कम गर्ने, र लगानीकर्ताको हित संरक्षण गर्ने उद्देश्य राखेको बताइएको छ।
लगानीकर्ताले अबदेखि सेयर कारोबार गर्नुअघि आफ्ना बैंक खातामा उपलब्ध रकम हेर्नुपर्नेछ, नत्र TMS प्रणालीले आदेश अस्वीकार गर्नेछ। यस्तो व्यवस्था लागू भएसँगै बजारको अनुशासनमा सुधार आउने आशा गरिएको छ।
