दोलखा– जिरी नगरपालिकाले चालु आर्थिक वर्ष २०८२/०८३ को ११ महिनामा कुल बजेटको ७१ दशमलव ६४ प्रतिशत खर्च तथा कार्यान्वयन गरेको जनाएको छ ।
नेपाल पत्रकार महासंघ दोलखा शाखाले आइतबार आयोजना गरेको ‘जिरी नगरपालिकाको विकास, समृद्धि र पर्यटन’ विषयक अन्तरक्रिया कार्यक्रममा प्रमुख प्रशासकीय अधिकृत राज कुमारी खत्रीले पुँजीगततर्फ ६४ दशमलव ५७ प्रतिशत र चालुतर्फ ७४ दशमलव ७२ प्रतिशत बजेट खर्च भएको जानकारी दिइन् ।
उनका अनुसार चालु आर्थिक वर्षको ११ महिनामा नगरपालिकाले ४ करोड ९५ लाख ४२ हजार ८ सय ८९ रुपैयाँ राजस्व संकलन गरेको छ ।
लक्ष्य नजिक पुग्ने गरी राजस्व संकलन गर्न सफल भएको तथा डिजिटल भुक्तानी प्रणाली –ईयप्टी) पूर्ण रूपमा कार्यान्वयनमा ल्याएको पनि उनले बताइन् । कार्यक्रममा शाखागत प्रगति, बजेट कार्यान्वयनको अवस्था तथा बेरुजु फर्छ्यौटबारे समेत छलफल गरिएको थियो ।
पर्यटन नै जिरीको समृद्धिको आधार : नगर प्रमुख
कार्यक्रमलाई सम्बोधन गर्दै नगर प्रमुख मित्रबहादुर जिरेलले जिरी नगरपालिका धार्मिक, आध्यात्मिक, सांस्कृतिक तथा प्राकृतिक सम्पदाले सम्पन्न नगर भएकाले यसको विकास र समृद्धिको मुख्य आधार पर्यटन नै रहेको बताए ।
उनले जिरी भ्रमण वर्ष २०२५ अन्तर्गत खेलकुद सप्ताह, जिरी कप, प्रमुख पर्यटकीय स्थलमा फोटो बुथ निर्माण, मिनी ताल स्तरोन्नति, प्रवर्द्धनात्मक भिडियो सामग्री निर्माण तथा प्रसारणलगायत कार्यक्रम सञ्चालन गरिएको जानकारी दिए ।
प्रकृति संरक्षण, पर्यटन र साहित्यलाई एकीकृत गर्दै ‘पर्यासाहित्य महोत्सव’ आयोजना गरिएको उल्लेख गर्दै उनले धार्मिक तथा पर्यटकीय क्षेत्रको विकासमार्फत नगरको आन्तरिक आय वृद्धि गर्ने लक्ष्य रहेको बताए ।
नगर प्रमुख जिरेलले जिरीको प्रचारप्रसारमा सञ्चारमाध्यमको महत्त्वपूर्ण भूमिका रहने उल्लेख गर्दै जिरीका धार्मिक, आध्यात्मिक तथा प्राकृतिक सम्पदालाई राष्ट्रिय तथा अन्तर्राष्ट्रिय स्तरमा चिनाउन सहयोग गर्न आग्रह गरे ।
चेर्दुङदेखि एलुङ गुम्बा हुँदै स्टोन पार्कसम्म पर्यटनको आकर्षण
अन्तरक्रिया कार्यक्रममा जिरीका पूर्व नगर प्रमुख टंक जिरेलले पछिल्ला वर्षहरूमा जिरी आउने पर्यटकको रोजाइमा चेर्दुङ पर्न थालेको बताए ।
उनका अनुसार चेर्दुङबाट गौरीशंकर, नुम्बुर र रोल्वालिङ हिमशृङ्खलासहित जिरी उपत्यकाको मनोरम दृश्य अवलोकन गर्न सकिन्छ । चेर्दुङको काखमा रहेको क्यान्सेपोखरी धार्मिक तथा प्राकृतिक महत्वका कारण पर्यटकको आकर्षणको केन्द्र बनेको बताए ।
उनले जिरी बजार आसपासमा मात्र सीमित नभई एलुङ गुम्बा, चेर्दुङ, क्यान्सेपोखरी, जिरेश्वरी मन्दिर, राम्बोले, जट्टापोखरी, गुराँस पार्क, बुद्ध पार्क तथा सिक्री गाउँजस्ता क्षेत्रलाई समेटेर पर्यटन प्रवर्द्धन गर्नुपर्ने आवश्यकता औँल्याए ।
विशेषगरी एलुङ गुम्बालाई अन्तर्राष्ट्रिय स्तरको बौद्ध आध्यात्मिक तथा ध्यान केन्द्रका रूपमा विकास गर्न सके जिरीको पर्यटन क्षेत्रमा ठूलो टेवा पुग्ने उनको भनाइ थियो ।
गुरु रिन्पोछे स्तूपा र स्टोन पार्कमा बढ्दो आकर्षण
स्थानीय अगुवा सोनाम शेर्पाले जिरी–२ र ३ मा निर्माणाधीन दक्षिण एसियाकै विशाल गुरु रिन्पोछे स्तूपाले जिरीलाई अन्तर्राष्ट्रिय बौद्ध तीर्थस्थलका रूपमा परिचित गराउने विश्वास व्यक्त गरे ।
उनले धार्मिक पर्यटनसँगै जिरेल र शेर्पा समुदायको संस्कृति, परम्परा, भेषभूषा र जीवनशैलीलाई समेत पर्यटनसँग जोड्नुपर्ने धारणा राखे ।
विशेषगरी दोलखा र रामेछापको सीमामा रहेको स्टोन पार्क प्राकृतिक रूपमा बनेका विशाल ढुङ्गाका कलात्मक संरचनाका कारण पछिल्लो समय चर्चित बन्दै गएको उल्लेख गर्दै उनले यसको संरक्षण, पूर्वाधार विकास र व्यवस्थित प्रचारप्रसारमा नगरपालिकाले थप ध्यान दिनुपर्ने सुझाव दिए ।
कार्यक्रममा उपप्रमुख कृष्णमाया बुढाथोकीले शिक्षा, स्वास्थ्य, खानेपानी, पूर्वाधार, कृषि, उद्यम विकास, रोजगार तथा पशु विकासका कार्यक्रमसँगै पर्यटन क्षेत्रको विकासलाई पनि नगरपालिकाले प्राथमिकतामा राखेको बताइन् ।
उनले पर्यटन क्षेत्रको विस्तारसँगै स्थानीय उत्पादन, रोजगारी र आयआर्जनका अवसर समेत वृद्धि हुने विश्वास व्यक्त गरिन् । सुवाश बस्नेत /दोलखा khabarhub
