काठमाडौं । क्यानडाको क्युबेकस्थित मोन्ट्रियलमा आयोजना भइरहेको ३६औँ अन्तर्राष्ट्रिय पर्यटन तथा ट्राभल शो २०२६ मा नेपाली पर्यटन कम्पनी Everest Pioneer Trek Nepal (P) Ltd. ले नेपालको प्रतिनिधित्व गरिरहेको छ । अक्टोबर ३० देखि नोभेम्बर १ सम्म Palais des congrès de Montréal मा सञ्चालन भइरहेको उक्त अन्तर्राष्ट्रिय पर्यटन प्रदर्शनी Expo Media Inc. ले आयोजना गरेको हो । प्रदर्शनीमा विश्वका विभिन्न देशका पर्यटन व्यवसायी, ट्राभल कम्पनी, सञ्चारमाध्यम तथा पर्यटन क्षेत्रका खरिदकर्ताहरूको सहभागिता रहेको छ ।
प्रदर्शनीमा नेपालको प्रतिनिधित्व गर्ने एकमात्र टुर अपरेटरका रूपमा सहभागी Everest Pioneer Trek Nepal ले नेपालको हिमाली साहसिक पर्यटन, पदयात्रा, प्राकृतिक सौन्दर्य, संस्कृति, सम्पदा तथा पर्यटकीय गन्तव्यहरूको अन्तर्राष्ट्रियस्तरमा प्रचारप्रसार गरिरहेको छ । कम्पनीका प्रमुख कार्यकारी अधिकृत (सीईओ) शाहदेव श्रेष्ठले प्रदर्शनीमा सहभागी अन्तर्राष्ट्रिय पर्यटन व्यवसायी तथा सम्भावित पर्यटकमाझ नेपालको पर्यटन सम्भावना र आकर्षणबारे जानकारी गराइरहेका छन् ।
विशेषगरी क्यानडेली पर्यटकलाई नेपाल भ्रमणका लागि आकर्षित गर्ने तथा नेपाल र क्यानडाबीच पर्यटन सम्बन्ध विस्तार गर्ने उद्देश्यले कम्पनीले सहभागिता जनाएको जनाएको छ । सन् २०१८ देखि सञ्चालनमा रहेको उक्त कम्पनीले यसपटकसमेत गरी करिब छैटौँ पटक अन्तर्राष्ट्रिय पर्यटन प्रदर्शनीमा सहभागिता जनाएको छ । कम्पनीका अनुसार आफ्नै लगानी र पहलमा नेपालको पर्यटन प्रवर्द्धनका लागि निरन्तर काम गर्दै आएको छ ।
नेपालका हिमाल, प्राकृतिक सम्पदा, सांस्कृतिक विविधता र साहसिक पर्यटनलाई विश्व पर्यटन बजारमा चिनाउँदै बढीभन्दा बढी विदेशी पर्यटकलाई नेपाल भित्र्याउने लक्ष्य कम्पनीले राखेको छ । कम्पनीले नेपालको पर्यटन प्रवर्द्धनमा सहयोग गर्ने क्यानडा, नेपाल तथा सम्पूर्ण शुभेच्छुकप्रति आभार व्यक्त गर्दै अन्तर्राष्ट्रिय पर्यटकलाई नेपाल भ्रमणका लागि निमन्त्रणा गरेको छ ।
