ट्र्याक्टरको ठक्करबाट महोत्तरीमा बालकको मृत्यु

महोत्तरीको मनरासिस्वा नगरपालिका–८ कटैया गाउँमा गएराति ट्र्याक्टरले ठक्कर दिँदा एक बालकको मृत्यु भएको छ।
मृत्यु हुनेमा नगरपालिका–८ बस्ने मसलाद्दीन अन्सारीका छोरा १४ वर्षीय मञ्जर अन्सारी रहेको जिल्ला प्रहरी कार्यालय महोत्तरीका प्रहरी उपरीक्षक श्यामकृष्ण अधिकारीले बताए।
गाउँको भित्री सडकमा अत्यधिक तीव्र गतिमा आउँदै गरेको ज१त ५२४१ नम्बरको ट्र्याक्टरले आफ्नै घर अगाडि उभिरहेका बालक अन्सारीलाई पछाडिबाटै अचानक ठक्कर दिँदा उनी गम्भीर घाइते भएका थिए। बालकलाई उपचारका लागि स्थानीय स्वास्थ्य क्लिनिकमा लैजाँदै गर्दा बाटोमै मृत्यु भएको प्रहरीले जनाएको छ।