गाजाको अल-शिफा अस्पताल मसान घाट जस्तै

२८ कात्तिक, काठमाडौं । उत्तरी गाजामा रहेको सबैभन्दा ठूलो अस्पताल ‘अल-शिफा ‘ इजरायली डिफेन्स फोर्स (आईडीएफ) को आक्रमणको निशानामा परी झन्डै मसान घाट’ जस्तै भएको विश्व स्वास्थ्य संगठन (डब्लूएचओ) ले बताएको छ ।

करिब ६ सय जनाले अस्पतालमा आश्रय लिइरहेको बताएका छन् । ‘अस्पतालभरि शवै शव रहेको छ । जसको उचित व्यवस्थापन गर्न सकिएको छैन शवलाई गाड्न र मुर्दा घरमा लैजान सकिएको छैन भन्ने जानकारी डब्लूएचओका प्रवक्ता क्रिस्चियन लिन्डमायरले बताएका छन् ।

हमासको स्वास्थ्य मन्त्रालयले करिब ६५० बिरामीसहित २ हजार ३ सय जना अस्पतालमा रहेको बताएको छ । अस्पतालका व्यवस्थापक डाक्टर मोहम्मद अबु सेलमियाले प्रतिबन्धका बाबजुद अस्पताल चलाउन निकै कठिन भएको बताएका छन् । उनले शवहरू कुहिन थालेको र कुकुरहरू पसेर खान थालेको समेत बताएका छन् । इजरायललले शवहरू व्यवस्थापनका लागि अनुमति नदिएको पनि उनको भनाइ छ । विद्युत् कटौती हुँदा नवजात शिशुहरूको मृत्युसमेत भएको उनले बताए ।

गत अक्टोबर ७ मा हमासले इजरायली भूमिमा आक्रमण गरेयता इजरायलले निरन्तर गाजा क्षेत्रमा आक्रमण गर्दै आएको छ । हमासको आक्रमणमा करिब १२ सयको मृत्यु भएको इजरायलले जनाएको छ । त्यस्तै इजरायलको आक्रमणमा परी ११ हजारभन्दा बढीको मृत्यु भएको बीबीसीले जनाएको छ । मारिनेमा ४ हजार ५ सयभन्दा बढी बालबालिका रहेका छन् ।