८ मङ्सिर, काठमाडौं । नेपाल विद्युत् प्राधिकरणले चालू आर्थिक वर्ष ०८०/०८१ को साउन, भदौ, असोज र कात्तिकमा १ अर्ब ३६ करोड १२ लाख युनिट विद्युत् भारतलाई निर्यात गरी १२ अर्ब ५० करोड ८ लाख रुपैयाँ आर्जन गरेको छ ।
गत आ.व ०७९/०८० को पहिलो चार महिनामा ९८ करोड ३८ लाख युनिट विद्युत् निर्यात गरी ७ अर्ब ६३ करोड ६४ लाख रुपैयाँ आर्जन गरिएको थियो । सोही अवधिको तुलनामा ४ अर्ब ८६ करोड ४४ लाख रुपैयाँले बढी आर्जन गरेको छ ।
औसत विद्युत् बिक्री दर प्रतियुनिट ९ रुपैयाँ १८ पैसा रहेको प्राधिकरणले साउनमा २ अर्ब १४ करोड ७६ लाख, भदौमा ३ अर्ब ४७ करोड ८५ लाख, असोजमा ४ अर्ब १७ करोड ७७ लाख र कात्तिकमा २ अर्ब ६९ करोड ७० लाख रुपैयाँको विद्युत् निर्यात गरेको छ । गत वर्ष सोही अवधिको समग्र औसत बिक्री दर प्रतियुनिट ७ रुपैयाँ ७६ पैसा थियो ।
प्राधिकरणका कार्यकारी निर्देशक कुलमान घिसिङले भारतीय रुपैयाँ आर्जन भएकाले यसबाट देशको विदेशी मुद्रा सञ्चितिको साथै नेपाल र भारतबीचको व्यापार घाटा कम गर्न योगदान पुगेको बताए ।
