असार ३०, काठमाडौं । असार २८ गते बिहान नारायणगढ मुग्लिन सडकखण्ड सिमलतालमा पहिरोमा परेर बेपत्ता भएका दुई वटा बसको चलानीमा उल्लेख गरिएभन्दा १५ जना यात्रु बढी रहेको पाइएको छ ।
जिल्ला प्रशासक कार्यालय चितवनले दिएको जानकारी अनुसार बसमा यात्रा गरेका तर चलानीमा उल्लेख नभएका मध्य १५ यात्रु रहेको पाईएको हो । यात्रुका आफन्तले विवरण टिपाए पछि जिल्ला प्रशासन कार्यालय चितवनले चलानीमा उल्लेख नभएका यात्रुबारे पनि खुलाएको थियो ।
जसमध्ये काठमाडौंबाट गौर जादै गरेको बागमती प्रदेश ०३२४९५ ख ००१ नम्बरको गणपति डिलक्स बसमा थप ११ जना यात्रुहरुका आफन्तहरुले हराएको विवरण टिपाएका थिए ।
आफन्तहरुले टिपाएको विवरण समेतलाई जोड्दा उक्त बसमा ३८ जना यात्रु रहेको पाइएको जिल्ला प्रशासन कार्यालय चितवनले जारी गरेको नोटमा उल्लेख गरिएको छ ।
यस्तै, वीरगञ्जबाट काठमाडौं जांदै गरेको बागमती प्रदेश ०३–००६ ख १५१६ नम्बरको एन्जल डिलक्स लेखेको बसको चलानीमा २३ यात्रु देखिए पनि बीचबाट थप ४ जना यात्रु चढेको पाइएको छ । चलानीमा उल्लेख नभएका दुवै बसमा गरेर थप १५ यात्रु यात्रारत रहेको देखिएको हो ।
घटनामा कुल ६५ यात्रु परेको देखिएको, ती मध्ये ३ जना पौडिएर बांच्न सफल भएको र ४ जनाको शव भेटिएको जिल्ला प्रशासन कार्यालय चितवनले जनाएको छ । तीमध्ये ३ जनाको सनाखत भएको र अर्को एक जनाको सनाखत हुन बांकी छ । अझै ५८ जना यात्रुको अवस्था अज्ञात छ ।
आज तेस्रो दिन पनि बस खसेको स्थान भन्दा झण्डै १ किलोमिटर तलबाट सशस्त्र प्रहरीको विपद् व्यवस्थापन तालिम शिक्षालय कुरिनटार र नेपाली सेनाको रसौलीस्थित विपद् व्यवस्थापन गणका तालिमप्राप्त उद्धारकर्मीहरुले बस र यात्रुको खोजी सुरु गरेका छन् । शुक्रबार र शनिबार दिनभर खोजी गरे पनि अझै बस भने पत्ता लाग्न सकेको छैन ।
