काठमाडौं । प्रमुख सत्तारुढ नेपाली कांग्रेसले प्रधानमन्त्री रहिरहने परिस्थिति समाप्त भएपछिको परिस्थिति बुझेरै पूर्वप्रधानमन्त्री पुष्पकमल दाहाल ‘प्रचण्ड’को अभिव्यक्ति आएको टिप्पणी गरेका छ ।
संसद् बैठकमा दलीय प्रतिनिधित्व गर्दै विशेष समयअन्तर्गत बोल्ने क्रममा कांग्रेसका प्रवक्तासमेत रहेका सांसद डा. प्रकाशशरण महतले यस्तो टिप्पणी गरेका हुन् ।
‘नेपाली कांग्रेससँग सहकार्य गरे पनि, एमालेसँग सहकार्य गरे पनि प्रधानमन्त्री प्रचण्डजीकै हुन्छ । आफूभन्दा बाहिर जाँदैन भन्ने मानसिकतामा हुनुहुन्थ्यो,’ उनले भने, ‘त्यो परिस्थिति समाप्त भएकाले धेरै अभिव्यक्ति त्यसबाट अभिप्रेरित भएर आएको मैले महसुस गरेँ ।’
सांसद महतले कांग्रेससँगको अघिल्लो गठबन्धन भत्काएर नेकपा एमालेसँग सत्ता साझेदारी गरेपछि प्रधानमन्त्रीका हैसियतमा प्रचण्डले दिएको अभिव्यक्तिसमेत स्मरण गराए ।
‘नेपाली कांग्रेससँगको गठबन्धन छाड्नु भयो । त्यसबेला आर्थिक स्थिति मैले भनेजस्तो भएन, अर्थमन्त्रीले सहयोग गरेन भन्ने जस्तो अभिव्यक्ति दिनुभयो,’ महतले भने, ‘तर, आज फेरि उहाँले त्यसबेला एक–एक गरेर धेरै उपलब्धि भएका थिए, मेरै नेतृत्वको सरकारले गरको भनेर दोहोर्याउनुभयो ।’
तत्कालीन अर्थमन्त्री रहेका सांसद महतले कांग्रेस र माओवादी गठबन्धनको सरकारको बेला आर्थिक मन्दीको अवस्था रहेको बताए । ‘त्यो अवस्थाबाट जुन आर्थिक रुपमा अगाडि बढाउने हामीले सशक्त कोसिस गर्यौँ,’ उनले भने, ‘त्यसमा हाम्रो सहभागिताले महत्वपूर्ण भूमिका निर्वाह गरेको थियो । त्यो उहाँ (प्रचण्ड)ले बुझ्नु पर्दछ ।’
महतले माओवादी अध्यक्ष प्रचण्डले बिहीबारको बैठकमा कांग्रेसकाप्रति गरेको टिप्पणीलाई आफ्नो पार्टीले अस्वाभाविक रुपमा नलिएको पनि स्पष्ट पारे । ‘प्रतिपक्षीले सत्तापक्षलाई आलोचना गर्छन्, हामीले अस्वाभाविक रुपमा लिएका छैनौँ,’ उनले भने ।
