काठमाडौं । नेपाली कांग्रेसले देशव्यापी राष्ट्रिय प्रचार अभियान सुरू गर्ने भएको छ । पार्टीको सूचना, सञ्चार तथा प्रचार विभागमार्फत् कांग्रेसले राष्ट्रिय प्रचार अभियान सुरू गर्ने भएको हो ।
‘राष्ट्र निर्माणमा युवाको योगदान, तथ्यमा आधारित प्रचार अभियान’ भन्ने नाराका साथ अभियान सुरू गर्ने तयारी गरिएको विभाग प्रमुख मीन विश्वकर्माले जानकारी दिए ।
‘केही शक्तिले कांग्रेस पार्टी मात्रै नभएर सिंगो व्यवस्था र प्रणालीलाई नै बदनाम हुने गरी नकारात्मक प्रचार गरिरहेका छन्,’ उनले भने, ‘यही सन्दर्भलाई दृष्टिगत गर्दै विभागले आम जनमानसमा कांग्रेसले गरेका सकारात्मक काम र त्यसबाट देशमा भएका परिवर्तनबारे तथ्यगत जानकारी दिन अभियान सञ्चालन हुन लागेको हो ।’
उनले अभियानअन्तर्गत फागुन ९ गतेबाट प्रदेशस्तरीय अभियान आयोजना गरिएको पनि बताए । प्रचार विभाग प्रमुख विश्वकर्माका अनुसार फागुन ९ गते कोशी प्रदेशको विराटनगर, १० गते मधेस प्रदेशको जनकपुर र १७ गते गण्डकी प्रदेशको पोखरामा प्रदेशस्तरीय अभियान गरिने छ ।
यसैगरी फागुन १८ गते लुम्बिनीको बुटवलमा, २० गते कर्णालीको सुर्खेतमा र २१ गते सुदूरपश्चिमको धनगढीमा कार्यक्रम गरिने विभागले जनाएको छ ।
कार्यक्रममा कांगेसका सम्बिन्धित प्रदेशबाट प्रतिनिधित्व गर्ने केन्द्रीय पदाधिकारी र सदस्यहरू, प्रदेश कार्यसमितिका पदाधिकारी र सदस्यहरू, प्रदेश सभाका सदस्यहरू, जिल्ला कार्यसमितिका पदाधिकारीको सहभागिता रहने बताइएको छ ।
यस्तै प्रचार विभागका प्रमुख र प्रवक्ताहरू, क्षेत्रीय कार्यसमितिका पदाधिकारी तथा सदस्यहरू र पार्टीका भ्रातृ तथा शुभेच्छुक संघसंस्थाका प्रमुखसँगै नेपाल प्रेस युनियनलगायत विभिन्न सञ्चार कर्ममा आवद्ध सञ्चारकर्मीहरूको पनि कार्यक्रममा सहभागिता रहने विश्वकर्माले जानकारी दिए ।
उनले प्रदेशस्तरीय कार्यक्रममा दुई वटा कार्यपत्रहरू प्रस्तुत हुने पनि बताए । विभाग प्रमुख विश्वकर्माका अनुसार पत्रकारद्वय हरिबहादुर थापा र डा। जगत नेपालले कार्यपत्र प्रस्तुत गर्ने कार्यक्रम तय भएको छ ।
