काठमाडौं । ताप्लेजुङको पाथीभरमा मन्दिरमा आईएमई ग्रुपले निर्माण गर्न लागेको केबलकारबारे तनाव बढेपछि गृहमन्त्री रमेश लेखकले कोशी प्रदेश पहाडका सांसदहरूसँग फेरि छलफल सुरु गरेका छन् ।
कोशी पहाडका जिल्लाबाट संघीय संसद्मा प्रतिनिधित्व गर्ने विभिन्न दलका नेताहरूसँग गृहमन्त्रीले संवाद सुरु गरेका हुन् ।
कोशीका सांसदहरूसँग सिंहदरबारमा छलफल भइरहेको सांसद उर्मिला थेबेले बताएकी छन् । उनका अनुसार छलफलमा आन्दोलनरत पक्ष ‘नो केबलकार समूह’लाई सहभागी गराइएको छैन ।
केबलकार निर्माणमा विवाद भएपछि सरकारले तत्काल निर्माणकार्य स्थगित गरेर आन्दोलनरत पक्षलाई वार्तामा आउन आग्रह गरेको छ ।
छलफलबाट आएका सुझावअनुसार ताप्लेजुङको केबलकारबारे सरकारले आवश्यक निर्णय लिने तयारी गरेको छ।
आईएमई ग्रुपले निर्माण गर्न लागेको उक्त केबलकारका कारण आदिवासी जनजातिहरूले मुक्कुमलुङ नामले पुकार्ने पाथीभरा क्षेत्र एक वर्षदेखि तनावबाट गुज्रिरहेको छ ।
गत माघ १५ मा पनि गृहमन्त्रीले कोशीका सांसदहरूसँग छलफल गरेका थिए । यसबीचमा ताप्लेजुङको काफ्लेपाटी र सदरमुकाम फुङलिङमा पनि झडप भएर तनाव भइसकेको छ ।
