काठमाडौं , ८ जेष्ठ । महानियन्त्रक गणेश प्रसाद पाण्डे सेवानिवृत्त भएपछि रिक्त भएको सचिव पदमा पदोन्नतिको प्रक्रिया अघि बढेको छ। लोक सेवा आयोगका अध्यक्ष माधवप्रसाद रेग्मीको अध्यक्षतामा बसेको सचिव पद पदोन्नति समितिले तीन जना सहसचिवलाई सिफारिस गरेको छ।
समितिले सचिव पदका लागि भूपाल बराल, डण्डुराज घिमिरे र डा. खगेन्द्र प्रसाद सुवेदीलाई सिफारिस गरेको हो। तीमध्ये सबैभन्दा उच्च स्थानमा रहेका बराल हाल वन तथा वातावरण मन्त्रालयमा कार्यरत छन्। उनी नेपाल प्रशासन सेवा तर्फका वरिष्ठ सहसचिव हुन्।
डण्डुराज घिमिरे दोस्रो स्थानमा छन्। उनी श्रम, रोजगार तथा सामाजिक सुरक्षा मन्त्रालयमा कार्यरत छन्। डा. खगेन्द्र प्रसाद सुवेदी भने लोक सेवा आयोगमा मनोवैज्ञानिकका रूपमा कार्यरत छन् र तेस्रो स्थानमा सिफारिस भएका हुन्। सुवेदी नेपाल शिक्षा सेवा अन्तर्गतका अधिकृत हुन्।
तीनै सिफारिसमध्ये बराल र घिमिरे नेपाल प्रशासन सेवासँग आबद्ध छन् भने सुवेदी शिक्षा सेवाका हुन्। उमेरका हिसाबले हेर्दा, डा. सुवेदी १८ भदौ २०८२ मा अनिवार्य सेवा अवकाशमा पुग्नेछन्। त्यसैले उनको सेवा अवधि अब सीमित छ। घिमिरे भने १ साउन २०८४ सम्म सरकारी सेवामा रहनेछन्। बरालको जन्म २०३५ सालमा भएकाले उनीसँग अझै लामो सेवा अवधि बाँकी छ, जसअनुसार उनी पाँच वर्षसम्म सचिवका रूपमा सेवा दिन सक्नेछन्।
यसैबीच, संस्कृति, पर्यटन तथा नागरिक उड्डयन मन्त्रालयका पूर्व सचिव विनोद प्रकाश सिंहको स्थानमा शोभाकान्त पौडेललाई सचिवमा पदोन्नति गरिएको छ। यद्यपि, पौडेलले अहिलेसम्म औपचारिक रूपमा जिम्मेवारी सम्हालेका छैनन्।
सचिव पदमा पदोन्नतिको अन्तिम निर्णय अब मन्त्रिपरिषद्को बैठकबाट हुनेछ। समितिको सिफारिस सरकारको नेतृत्व व्यवस्थापनमा निरन्तरता, स्थायित्व र दक्षताको प्रत्याभूति दिने प्रयासको रूपमा हेरिएको छ।
