कोलालम्पुर | ACC इस्ट एसिया कप २०२५
नेपाल U-16 टोलीले आज एक रोमाञ्चक फाइनल खेलमा सिंगापुरलाई २ विकेटले पराजित गर्दै ACC इस्ट एसिया कप २०२५ को उपाधि जित्न सफल भएको छ। दबाबपूर्ण परिस्थितिमा जब हार निश्चितजस्तै देखिँदै थियो, जॉय थापाले खेलेको संयमित, जिम्मेवार र अविजित इनिङ्सले सम्पूर्ण खेलको मोड परिवर्तन गरिदियो।
११४ रनको लक्ष्य पछ्याइरहँदा नेपाल ६२-५ को अवस्थामा थियो जब जॉय क्रिजमा आएका थिए। त्यसपछि विकेटहरू झर्दै जाँदा नेपाल ९२-८ मा पुगेको थियो। खेल नेपालको हातबाट जाँदैछ जस्तो देखिँदा, जॉयले एक ओभरमा लगातार ३ चौका प्रहार गर्दै खेल फर्काए। त्यसपछि अभय यादवले छक्का प्रहार गर्दै नेपाललाई नाटकीय र ऐतिहासिक जित दिलाए।
जॉय थापा केवल फाइनलमा मात्र होइन, समग्र प्रतियोगिता भरि निरन्तर उत्कृष्ट प्रदर्शन गर्दै आएका थिए। फाइनल खेलअघि नै उनले २ अर्धशतक प्रहार गरिसकेका थिए ।
नेपालले २ विकेटको निकै साँघुरो अन्तरले जित दर्ता गर्दा, बलिङतर्फ अभय यादव र सुशील बहादुरले समान ३-३ विकेट लिँदै फाइनलमा महत्त्वपूर्ण योगदान दिए।
यो प्रतियोगितामा १० राष्ट्रहरू — नेपाल, आयोजक मलेसिया, सिंगापुर, हङकङ, जापान, थाइल्यान्ड, इन्डोनेसिया, म्यानमार, भुटान र माल्दिभ्स सहभागी थिए। यो जितसँगै नेपालले युवास्तरको क्रिकेटमा आफ्नो प्रभुत्व बलियो बनाउँदै विश्व क्रिकेट्मा नयाँ सम्भावनाको संकेत दिएको छ।
एन्जल्स हार्ट नेशनल स्कुलका विद्यार्थी तथा एन्जल्स स्पोर्ट्स क्रिकेट एकेडेमीका होनहार खेलाडी जॉय थापाले फाइनलमा देखाएको धैर्यता, आत्मविश्वास र क्लासले नेपाली क्रिकेटको उज्ज्वल भविष्यतर्फ संकेत गरेको छ।
