एजेन्सी, ३ साउन । जर्मन चान्सलर फ्रेडरिक मर्जले अमेरिकी भन्सार दुवै देशको अर्थतन्त्रका लागि हानिकारक हुने बताएका छन् । उनले युरोपेली संघ र संयुक्त राज्य अमेरिका बीचको भन्सार वार्ता अन्तिम चरणमा प्रवेश गरेको पनि बताए ।
अमेरिकी राष्ट्रपति डोनाल्ड ट्रम्पले अगस्ट १ देखि युरोपेली संघको निर्यातमा ३० प्रतिशत कर लगाउने योजनाको घोषणा गरेपछि स्थिति तनावपूर्ण बन्दै गएको हो ।
युरोपेली संघका प्रवक्ताले व्यापार तथा आर्थिक सुरक्षा आयुक्त मारोस सेफकोभिक हाल अमेरिकी वाणिज्य सचिव हावर्ड लुटनिक र अमेरिकी व्यापार प्रतिनिधि जेमिसन ग्रीरसँग वार्ताको तयारी भएको पुष्टि भएको छ । अमेरिकाले करहरू जारी राख्यो भने युरोपेली संघले प्रतिशोधात्मक कदम चाल्ने जनाएको छ ।
शुक्रबार बर्लिनमा एक पत्रकार सम्मेलनमा, मर्जले सम्भावित क्षेत्र–विशिष्ट छुटहरूको बारेमा कर वार्ता जारी रहेको बताए। उनले ‘दुबै पक्षका लागि सम्भव भएसम्म न्यूनतम कर’ मा पुग्ने आशा गर्दै सहमति हुने जनाए ।
उनले प्रस्तावित अमेरिकी करहरू दुवै अर्थतन्त्रका लागि हानिकारक हुने चेतावनी पनि दिए। संयुक्त राज्य अमेरिका जर्मनीको सबैभन्दा ठूलो निर्यात बजार हो।
जर्मन सरकारी तथ्याङ्क अनुसार, २०२४ मा, जर्मनीले संयुक्त राज्य अमेरिकामा १६१ अर्ब युरो (१८८ अर्ब अमेरिकी डलर) मूल्यका सामानहरू निर्यात गरेको थियो । (सीसीटीभीप्लस)
