काठमाडौं । टोखा नगरपालिका वडा नं. ३ कार्यालयले तलेजु गुठीलाई आवश्यक पर्ने पूजाका सामग्री तथा क्याटरिङ्गका सामानहरू हस्तान्तरण गरेको छ । शनिबार वडा कार्यालय सभाहलमा आयोजित कार्यक्रममा सामग्रीहरू औपचारिक रूपमा गुठीलाई बुझाइएको हो ।
कार्यक्रममा वडा अध्यक्ष रमेश डंगोलले गुठीको धार्मिक तथा सांस्कृतिक कार्यलाई सुदृढ बनाउन वडा कार्यालय निरन्तर साथ रहने बताउँदै, “हाम्रो परम्परा र संस्कृतिको संरक्षण सबैको दायित्व हो, त्यसमा वडा कार्यालय सधैं अगाडि रहन्छ” भन्नुभयो ।
वडा सचिव सानु श्रेष्ठ भन्नुहुन्छ, सामुदायिक संस्थाहरूको सशक्तिकरणका लागि आवश्यक सहयोग प्रदान गर्न वडाको प्रतिबद्धता दोहोर्याउँदै, “यो सहयोग केवल सामग्री हस्तान्तरण मात्र होइन, सामुदायिक ऐक्यबद्धताको प्रतीक पनि हो” ।
त्यस्तै, वडा सदस्य शान्ता राईले गुठीको सक्रियता र स्थानीयको सहभागिता प्रशंसनीय रहेको उल्लेख गर्दै, “गुठीहरूले हाम्रो संस्कृति जोगाइरहेका छन्, यसमा सबैले गर्व गर्नुपर्छ” भन्नुभयाे ।
कार्यक्रममा गुठीका पदाधिकारी, स्थानीय अगुवाहरू र सरोकारवालाहरूको उल्लेखनीय उपस्थिति रहेको थियो ।
