कांग्रेसले रामहरिलाई सुनुवाइ समिति सभापतिको उम्मेदवार बनाउने

काठमाडौं । नेपाली कांग्रेसले राज्य व्यवस्था तथा सुशासन समितिबाट राजीनामा दिएका रामहरि खतिवडालाई संसदीय सुनुवाइ (संयुक्त) समितिको सभापतिका लागि उम्मेदवार बनाउने भएको छ ।

कांग्रेसकै सांसद ईश्वरी न्यौपानेले राज्यव्यवस्था समितिको सभापति बन्न भदौ १० गते राजीनामा दिएपछि रिक्त रहेको सभापतिका लागि कांग्रेसले खतिवडालाई उम्मेदवार बनाउने भएको हो ।

सुनुवाइ समितिको सभापति चयनका लागि शुक्रबार निर्वाचन तय गरिएको छ । निर्वाचनका लागि बिहीबार दिउँसो २ देखि ४ बजेसम्म उम्मेदवारी मनोनयनको कार्यसूची छ ।

सांसद खतिवडाले संसदीय सुनुवाइ समितिको सभापतिका रूपमा आफूलाई उम्मेदवार बनाउने हल्ला सुनेको प्रतिक्रिया दिएका छन् । ‘हल्ला आएको छ, पार्टीले दिने जिम्मेवारी लिन तयार छु,’ उनले खबरहबसँग भने ।