काठमाडौँ । आगामी फागुन २१ गते हुने प्रतिनिधि सभाको निर्वाचनका लागि राजनीतिकर्मीसँगै फरक पेसा र व्यवसायमा आबद्ध पर्यटन व्यवसायी विभिन्न दलका तर्फबाट र स्वतन्त्र उम्मेदवारका रूपमा सहभागी हुँदैछन् ।
निर्वाचनमा पुरानो राजनीतिक विरासत बोकेका र नयाँ पार्टीबाट व्यावसायिक घराना र उद्यमीसँगै पर्यटन व्यवसायीसमेत निर्वाचनमा होमिएका छन् । पर्यटन क्षेत्रको विकासका लागि कार्यान्वयनयोग्य योजनासहित जनमत प्राप्त गर्न उद्योगपतिदेखि हिमाल आरोहीसम्म चुनावी मैदानमा छन् ।
पर्यटनलगायत विविध क्षेत्रमा अर्बौंको लगानी रहेका नेपाली कांग्रेसका नेता विनोद चौधरी नवलपरासी–१ (बर्दघाट सुस्ता पश्चिम) बाट प्रत्यक्ष चुनावी प्रतिस्पर्धामा उत्रिएका छन् । चौधरी अघिल्लो निर्वाचनमा समेत सोही क्षेत्रबाट निर्वाचित भएका थिए ।
पर्यटन बोर्डका पूर्वप्रमुख कार्यकारी अधिकृत तथा पर्यटन व्यवसायी धनञ्जय रेग्मी राष्ट्रिय स्वतन्त्र पार्टीका तर्फबाट स्याङ्जा–१ बाट चुनाव लडेर पहिलो पटक संसदीय निर्वाचन लड्दै छन् । त्यस्तै पेसाले पर्यटन व्यवसायी रहेका ट्रेकिङ एजेन्सिज एसोसिएसन अफ नेपाल (टान) का पूर्वअध्यक्ष रमेशप्रसाद धमला नेपाली कांग्रेसबाट धादिङ–२ को उम्मेदवार बनेका छन् । पर्यटन व्यवसायी कृष्ण रिजाल कांग्रेसबाटै धादिङ–१ मा उम्मेदवार बनेका छन् । पर्यटन व्यवसायी प्रेम खत्री नेपाली गोरखा–१ मा कांग्रेसबाट उम्मेदवार बनेका छन् ।
मनाङमा टेकबहादुर गुरुङ र मुस्ताङमा पर्यटन व्यवसायी योगेश गौचन थकाली नेपाली कांग्रेसबाट चुनावी प्रतिस्पर्धामा छन् । उद्योग, होटेल, निर्माण र ऊर्जा व्यवसायमा लगानी रहेका कृष्णकुमार (किसान) श्रेष्ठ बारा–४ मा उम्मेदवार बनेका छन् । उनले नेपाली कम्युनिस्ट पार्टी (नेकपा) बाट उम्मेदवार भएका हुन् ।
त्यस्तै गरी पर्यटन तथा ट्राभल व्यवसाय आबद्ध भगीरथ सापकोटा–नेकपा (एमाले) का तर्फबाट नवलपुर–१ उम्मेदवार बनेका छन् । होटेल व्यवसायमा रहेका सुमन साय नेपाली कम्युनिस्ट पार्टीका तर्फबाट काठमाडौँ–८ को उम्मेदवारनेका छन् । ट्राभल, ट्रेकिङ सर्भिस, होटेलसहितका व्यवसायमा संलग्न राष्ट्रिय स्वतन्त्र पार्टीका नेता डिपी अर्याल काठमाडौँ–९ बाट चुनावी प्रतिस्पर्धा गदैर्छन् ।
हिमाल आरोही मिङ्मा शेर्पा राष्ट्रिय स्वतन्त्र पार्टीका तर्फबाट सङ्खुवासभामा निर्वाचन लड्दै छन् ।
