काठमाडौँ । ‘पुर्खाको पौरख, नेपालीको गौरव’ भन्ने मूल नाराका साथ काठमाडौँ महानगरपालिका वडा नं १५ द्वारा आयोजित ‘दोस्रो स्वयम्भू महोत्सव २०८२’ आज शनिबार भव्यताका साथ सम्पन्न भएको छ। गत वैशाख १२ गतेदेखि सुरु भएको उक्त महोत्सव आठ दिनसम्म विभिन्न सांस्कृतिक तथा व्यापारिक गतिविधिहरू गर्दै आज समापन भएको हो।
स्वयम्भू भगवान पाउमा आयोजित समापन कार्यक्रमलाई सम्बोधन गर्दै महोत्सव मूल समारोह समितिका अध्यक्ष एवं वडा नं १५ का वडाध्यक्ष श्री ईश्वरमान डंगोलले महोत्सवले स्थानीय कला, संस्कृति र परम्पराको संरक्षणमा ठूलो टेवा पुर्याएको बताउनुभयो। उहाँले भन्नुभयो, “यो महोत्सव केवल मनोरञ्जनका लागि मात्र थिएन, हाम्रा पुर्खाले छोडेका अमूल्य सम्पदा, भाषा, धर्म र परम्परालाई नयाँ पुस्तामा हस्तान्तरण गर्ने र स्थानीय व्यवसायीहरूलाई प्रोत्साहन गर्ने हाम्रो मुख्य उद्देश्य थियो। सहभागीहरूको उत्साहजनक उपस्थिति र सक्रियताले हामीलाई आगामी दिनमा यस्ता कार्यहरू गर्न थप ऊर्जा मिलेको छ।”
कार्यक्रमका प्रमुख अतिथि नेपाल ओलम्पिक कमिटीका अध्यक्ष एवं पूर्व मन्त्री श्री जीवनराम श्रेष्ठले पानसमा दीप प्रज्वलन गरी उद्घाटन गरिएको उक्त महोत्सवको समापन अवसरमा बोल्दै स्थानीय उत्पादन र संस्कृतिको जगेर्ना स्थानीय सरकारबाटै सुरु हुनु निकै सराहनीय कार्य भएको बताउनुभयो। उहाँले काठमाडौँको ऐतिहासिक गरिमालाई जोगाइराख्न वडाले खेलेको भूमिकाको प्रशंसा गर्नुभयो।
महोत्सवका मुख्य आकर्षण र गतिविधिहरू
समापन समारोहमा सांस्कृतिक जागरण समूह १५ का महिला दिदीबहिनीहरूले आकर्षक नृत्य प्रस्तुत गरेका थिए। महोत्सव अवधिभर राखिएका विभिन्न स्टलहरूले स्थानीय व्यवसायीहरूको उत्साह बढाएको थियो। विशेष गरी वडा कार्यालयबाट तालिम प्राप्त व्यक्तिहरूद्वारा तयार पारिएको कौसी खेती, बेकरी, परम्परागत नेवारी खानाका परिकारहरू र हस्तकलाका सामग्रीहरू अवलोकनकर्ताको रोजाइमा परेका थिए।
कार्यक्रममा स्वयम्भू प्रहरी वृत्तका डीएसपी श्री मोहनमणि अधिकारी, वडा सचिव श्री प्रमोद अधिकारी, इ. श्री सुमन बाद्य श्रेष्ठ, महोत्सव गीतका रचनाकार श्री राजभाई जकमि, वडा अधिकृत श्री अनिता के.सी., विभिन्न टोलका संयोजकहरू, विद्यालयका शिक्षक–विद्यार्थीहरू, संघ–संस्थाका प्रतिनिधिहरू तथा स्थानीय बासिन्दाहरूको बाक्लो सहभागिता रहेको थियो।
स्थानीय सहभागीहरूले महोत्सवले आफ्नो समुदायमा एकताको भावना बढाएको र व्यापार-व्यवसायमा नयाँ अवसरहरूको ढोका खोलेको भन्दै खुसी व्यक्त गरे। महोत्सव समापनसँगै आयोजक समितिले सहभागी र सहयोगी सबैलाई धन्यवाद ज्ञापन गर्दै आगामी वर्षहरूमा अझ परिष्कृत रूपमा यस्ता कार्यक्रमहरूलाई निरन्तरता दिने प्रतिबद्धता व्यक्त गर्यो। “चाँडै भेटौला” भन्ने बाचाका साथ आज महोत्सव विधिवत रूपमा सम्पन्न भएको छ।
