ललितपुर : ललितपुर महानगरले आर्थिक वर्ष २०८३–०८४ को नीति तथा कार्यक्रम तर्जुमा सम्बन्धमा ललितपुरका संघीय र प्रदेश सांसदसँग छलफल गरेको छ । यस अघि महानगरले सरोकारवाला र सल्लाहकारहरुसँग बजेट तथा नीति तथा कार्यक्रममा समावेश गर्नुपर्ने विषय बारे सुझाव लिन छलफल आयोजना गरेको थियो ।
छलफल कार्यक्रममा संघीय सांसद जगदीश खरेलले आउँदो नीति तथा कार्यक्रमले १० वर्षको लागि ‘मास्टर प्लान’ तयार गर्नुपर्ने बताए । महानगरले महानगरवासीलाई रोजगारसँग जोड्नुपर्ने प्रष्ट पारे । उनले भने, ‘निर्वाचनका बेला मैले एक मिनेटमा लगभग दुई जनालाई भेटेँ होला, त्यो बेला उहाँहरु सबैको कुरा रोजगारी भएन भन्ने थियो, आर्थिक आत्मनिर्भरतासँग जोडिएको थियो ।’
संघीय सांसद प्रभा कार्कीले महानगरमा पार्किङको समस्या धेरै भएको बताउँदै अबको नीति तथा कार्यक्रमले त्यसलाई सम्बोधन गर्नुपर्ने बताइन् । सार्वजनिक जग्गा संरक्षण अर्को महत्वपूर्ण विषय भएको बताउँदै सार्वजनिक जग्गा संरक्षणका लागि महानगरको भूमिका महत्वपूर्ण भएको प्रष्ट पारिन् ।
ललितपुरका प्रदेश सांसद तथा पूर्वमन्त्री रामकृष्ण चित्रकारले अबको नीति तथा कार्यक्रमले मूर्त सँगसँगै अमूर्त सम्पदाको संरक्षणलाई थप प्राथमिकता दिनुपर्ने धारणा राखे । अमूर्त सम्पदा मानव जीवनसँग प्रत्यक्ष जोडिएको हुनाले ती सम्पदाको संरक्षण अझै महत्वपूर्ण बताए । मूर्त र अर्मूत सम्पदाबीच अन्योन्याश्रित सम्बन्ध भएको बताउँदै अमूर्त सम्पदाको संरक्षणले मूर्त सम्पदा समेत संरक्षण गर्न अप्रत्यक्ष रुपमा सहयोग पुग्ने उनको भनाई थियो । उनले सामुदायिक विद्यालयमा विद्यार्थी र अभिभावकको रुचि जगाउन महानगरले ठोस कार्यक्रम ल्याउनुपर्ने बताए ।
प्रदेश सांसद प्रेमभक्त महर्जन महानगर बन्ने क्रममा जोडिएका चक्रपथ बाहिरका वडाहरुको विकासका लागि महानगरले आगामी आर्थिक वर्षको बजेट, नीति तथा कार्यक्रमले विशेष ढंगले सम्बोधन गनुपर्ने बताए । उनले चक्रपथ बाहिरका वडामा गर्नपर्ने काम धेरै भएको बताउँदै कृषिलाई प्राथमिकतामा राख्नुपर्ने आंैल्याए । कार्यविनायक मन्दिर भूक्षयका कारण जोखिममा पर्दै गएको बताउँदै यसको संरक्षणका लागि विशेष कार्यक्रम ल्याउनुपर्ने उनको भनाइ थियो ।
महानगर प्रमुख चिरीबाबु महर्जनले संघीय र प्रदेश सांसदहरुबाट आएको सुझावलाई आउँदो बजेट, नीति तथा कार्यक्रमले सम्बोधन गर्ने बताए । हरियाली संरक्षण, वातावरण संरक्षणमा महानगरले गरेको कामको व्याख्या गर्दै सम्पदा संरक्षण र हरियाली प्रबर्धनमा उल्लेखनीय काम गरेको व्याख्या गरे । उपप्रमुख मञ्जली शाक्य बज्राचार्यले तीनै वटा सरकारको मुख्य धेय नागरिकलाई सेवा गर्नु भएको बताउँदै संविधानको मर्मं अनुसार सहकार्य र सहअस्तित्वको अवधारणालाई आत्मसात गरेर अघि बढ्नु पर्ने बताए ।
रोजगारी सिर्जनाका लागि महानगरले धेरै क्षेत्रमा तालिम आयोजना गरेको बताउँदै तालिम लिएर जनशक्ति बजारमा रहेको बताइन् । ललितपुर महानगरका सूचना अधिकारी देवप्रसाद गुरागाईंले महानगरले सम्पदा संरक्षणसँगसँगै हरियाली प्रबर्धन र स्वास्थ्य क्षेत्रमा महानगरले गरेका कामलाई अन्य पालिकाले समेत अनुसरण गरेका स्पष्ट पारे । कार्यक्रममा विषयगत समितिका संयोजक र शाखा, महाशाखा प्रमुखहरुको उपस्थिति रहेको थियो ।
