काठमाडौं । एनएमबि म्युचुअल फण्डअन्तर्गत एनएमबि क्यापिटल लिमिटेड योजना व्यवस्थापक रहेको एनएमबि सरल बचत फन्ड–इले आर्थिक वर्ष २०८२/८३ का लागि ५.२५ प्रतिशत नगद प्रतिफल वितरण गर्ने भएको छ ।
फन्डले २०८३ असार मसान्तमा कायम ४ अर्ब ८१ करोड १७ लाख ५५ हजार ९७८ रुपैयाँ ४० पैसाको इकाई पुँजीमा करसहित ५.२५ प्रतिशतका दरले २५ करोड ६८ लाख १७ हजार १८८ रुपैयाँ ८७ पैसाको नगद प्रतिफल वितरण गर्ने निर्णय गरेको हो ।
कम्पनीका अनुसार उक्त प्रतिफलका लागि २०८३ साउन २१ गतेसम्म इकाइधनी दर्ता किताबमा कायम रहेका इकाइधनी मात्र योग्य हुनेछन् ।
प्रतिफल वितरण प्रक्रिया पारदर्शी, व्यवस्थित तथा नियामकीय व्यवस्थाअनुसार सम्पन्न गरिने कम्पनीले जनाएको छ । साथै लाभांश पुनर्लगानी (डिभिडेन्ड रिइन्भेस्टमेन्ट प्लान) रोज्ने इकाइधनीले प्राप्त प्रतिफलबाट थप इकाई खरिद गरी आफ्नो लगानी विस्तार गर्न सक्ने व्यवस्था गरिएको छ । पुनर्लगानीमा सहभागी नहुने इकाइधनीको प्रतिफल कर कट्टीपश्चात् सम्बन्धित बैंक खातामा जम्मा गरिने कम्पनीले जनाएको छ ।
एनएमबि क्यापिटल लिमिटेडले दीर्घकालीन लगानी व्यवस्थापन, जोखिम नियन्त्रण तथा स्थिर प्रतिफलमार्फत लगानीकर्ताको विश्वासलाई थप सुदृढ बनाउने प्रतिबद्धता व्यक्त गरेको छ । कम्पनीले आगामी दिनमा पनि बजार अवस्था, लगानी अवसर तथा लगानीकर्ताको हितलाई प्राथमिकतामा राख्दै प्रभावकारी फण्ड व्यवस्थापनलाई निरन्तरता दिने जनाएको छ ।
